Елордада қар күреуге 2 600-ден астам жұмысшы жұмылдырылды

Астананың коммуналдық қызметі тәулік бойы жұмысын күшейтілген үздіксіз режимде жалғастыруда. Күн сайын олардың күшімен қаладан ондаған мың текше метр қар шығарылады, деп хабарлады Elordainfo.kz.

9 қаңтарда күндізгі ауысымға қар тазалау жұмысына 2 600-ден астам жол жұмысшысы мен 1 700-ден астам арнайы техника жұмылдырылды.

9 қаңтарға қараған түні елордадан қар полигондарына 55 мың текше метрден астам қар 4 068 рейспен шығарылды.

Қыс мезгілі басталғалы қаладан 2 638 609 текше метр қар 205 297 ауыр жүк рейсімен шығарылды.

«Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие», - делінген хабарламада.

Айта кетейік, қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, онда бейнебақылау камералары орнатылып, жарықтандыру қосылған.