Астананың айналма жолында Wildberries-тің логистикалық хабы салынып жатыр

Астананың Байқоңыр ауданында логистикалық орталық салу жоспарланып отыр, деп хабарлайды Elordainfo.kz Астана қаласының Сәулет, қала құрылысы және жер қатынастары басқармасына сілтеме жасап.

Ведомство мәліметінше, қала әкімдігінің 2024 жылғы 4 сәуірдегі қаулысымен С331 көшесінде орналасқан жер учаскесіне логистикалық орталық салу үшін «ИМВБКЗ» ЖШС-не уақытша өтеусіз жер пайдалану құқығы берілген.

«Жер учаскесін пайдалану мерзімі 2028 жылғы 30 қыркүйекке дейін белгіленген», - делінген хабарламада.

Айта кетейік, «ИМВБКЗ» ЖШС бұл - Қазақстан аумағындағы «Wildberries» маркетплейсінің заңды тұлғасы болып табылады.

Еске салсақ, Астананың «Алматы» ауданында 2 мың орынға шақталған мектеп салына бастады.