Іздеу Банк те, полиция да сұрамайды: Кірістер комитеті SMS-кодқа қатысты маңызды ескерту жасады
Дәукен Тұрдашев
SMS арқылы келетін растау кодын бөгде адамға айту – жеке деректер мен қаржыға қол жеткізудің бір жолын ашуы мүмкін. Қаржы министрлігінің Мемлекеттік кірістер комитеті азаматтарды мұндай кодтарды ешкімге бермеуге шақырды, деп хабарлайды Elordainfo.kz Кірістер комитетіне сілтеме жасап.
SMS-код – белгілі бір сервистегі операцияны немесе телефон нөмірін растауға арналған цифрлық кілт. Мысалы, eGov Mobile қызметінде нөмірді растау кезінде осындай код жіберіледі. Оны үшінші тұлғаға айту жеке деректерді қорғауға қауіп төндіруі мүмкін.
Алаяқтар мұндай кодтарды түрлі сылтаумен сұрайды. Олар өзін банк қызметкері, полиция немесе мемлекеттік орган өкілі ретінде таныстырып, адамның шотына қатысты мәселе туындағанын айтуы мүмкін. Кей жағдайда «шотыңыз бұғатталады», «күдікті операция анықталды» деп қорқытып, азаматты асықтыруға тырысады.
Сондықтан телефон арқылы сөйлескен адам SMS-кодты атауды немесе хабарламадағы кодты оқып беруді сұраса, әңгімені бірден тоқтатқан жөн.
Алаяқтыққа күмәндансаңыз:
– SMS-кодты ешкімге айтпаңыз;
– күмәнді сілтемелерге өтпеңіз;
– қоңырау шалған адам ұсынған нөмірге қайта хабарласпаңыз;
– банкке немесе тиісті мемлекеттік органға тек ресми байланыс арналары арқылы өзіңіз хабарласыңыз.
Мамандардың айтуынша, алаяқтардың басты тәсілдерінің бірі – адамды эмоциялық қысымға алып, тез шешім қабылдату. Сондықтан бейтаныс адамның талабына асығыс жауап бермей, ақпаратты ресми дереккөз арқылы тексеру маңызды.
Есте сақтайтын қарапайым қағида бар: SMS-код тек оны алған адамның өзіне арналған.
Банк, полиция немесе мемлекеттік органдардың қызметкерлері телефон арқылы SMS арқылы келген растау кодын айтып беруді сұрамауы тиіс. Кодты бөгде адамға беру – аккаунтқа, жеке деректерге немесе қаржыға қол жеткізу қаупін арттырады.
«SMS-код – ақшаңыздың кілті» дегенді есте сақтаған жөн. Цифрлық қауіпсіздікте қарапайым сақтықтың өзі алаяқтардың әрекетіне тосқауыл бола алады.
