Астана мәслихатының төрағасы белгілі жазушы Роза Мұқанованы мерейтойымен құттықтады

Астана қаласы мәслихатының төрағасы Ерлан Каналимов Қазақстан Республикасының еңбек сіңірген қайраткері, «Құрмет» орденінің иегері, Халықаралық «Алаш» әдеби сыйлығының лауреаты Роза Мұқанованы 60 жылдық мерейтойымен құттықтады, деп хабарлады Elordainfo.kz.

Сезімтал, сырлы және дара шығармалары арқылы Роза Мұқанованың есімі әдебиетсүйер қауымға кеңінен танылған. Оның «Жарық дүние», «Дүние кезек» және «Құдірет-Кие» әңгімелер жинағы талғампаз оқырмандардың жоғары бағасына ие болды. Сонымен қатар, «Мәңгілік бала бейне», «Шатыр астындағы Мен» және өзге де қойылымдары сахна төрінде зерек көрерменнің көкжиегін кеңейткен өміршең туындылар болып табылады.

«Роза Қажығалымқызын 60 жылдық мерейтойымен құттықтай отырып, төл әдебиетіміздің дамуына қосып жатқан зор үлесі үшін алғысымды білдіремін. Әлі де бай шығармашылығыңыздан қол үзбей, асыл қаламыңызды қолыңыздан түсірмей, терең де телегей, көркем де көкжиегі кең туындыларыңыз халық қазынасын молайта берсін!», - деді Ерлан Каналимов.