«Қазақстан Барысы-2024» турнирінің жеңімпазы - Ерасыл Қажыбаев

«Барыс Арена» спорт сарайында өткен XIII Қазақстан барысы өз мәресіне жетті, деп хабарлады Elordainfo.kz.

Еліміздің барлық өңірінен 42 балуан қатысқан бәсекеде Абай облысының өкілі Ерасыл Қажыбаев (152 келі) чемпион атанды. Финалдық белдесуде ол салмағы ең жеңіл ТОП-5 спортшының қатарына кіретін Ерсұлтан Мұзаппаровтан (98 келі) басым түсті.

Үшінші орын үшін таласта 35 жастағы Саят Шамшиев (Абай облысы) мықтыларды жеңіп келген Әділ Оразбаевтан үстем болды.

Ерасыл Қажыбаев жарыс жолында кімдерді жеңді?

1/16 финал. Асылан Сағитбек (Қостанай облысы) - таза жеңіс
1/8 финал. Марат Байкамуров (Әскер барысы) - белдесуде жеңді
1/4 финал. Мұхтар Дәлелханұлы (Павлодар облысы) - таза жеңіс
1/2 финал. Саят Шамшиев (Абай облысы) - таза жеңіс
Финал. Ерсұлтан Мұзаппаров (Шымкент қаласы) - белдесуде жеңді.

Айта кетейік, Ерасыл Қажыбаев пен Ерсұлтан Мұзаппаровтың арасындағы бұл алғашқы белдесу емес. Осыған дейін 2018 жылы жартылай финалда да Ерасыл Қажыбаев қарсыласынан айласын асырған болатын.

Ерасыл Қажыбаев бұған дейін 2 мәрте финалға дейін жеткен. 2018 жылы финалда Ержан Шынкеевтен жеңілсе, 2019 жылы Айбек Нұғымаровтан есе жіберген.

Турнир барысы қалай өтті?

⁃ «Әскер барысы» Әділ Оразбаев жарыс жолында Ғалымжан Қырықбай (2023 жылғы  чемпион) мен Мақсат Исағабыловтан (2022 жылғы чемпион) басым түсті. Бірақ 4-орынға тұрақтады.

 ⁃ Ерсұлтан Мұзаппаров (Шымкентқ.) пен Саят Шамшиев (Абай облысы) ең көп 6 белдесу (5 жеңіс, 1 жеңіліс) өткізді.

 ⁃ Турнирдің ең егде 35 жастағы қатысушысы - Саят Шамшиев (Абай облысы) қола жүлдеге ие болды.

- 1/4 финалда Ерсұлтан Мұзаппаров пен Айбек Серікбаев (Қызылорда облысы) арасындағы белдесуде жеңімпаз анықталмай, салмағының жеңілдігіне байланысты Ерсұлтан келесі айналымға өтті.

- Маңғыстау облысынан ағайынды Нұрдәулет пен Дәурен Жарылғапов, Батыс Қазақстан облысынан Замир мен Ерназар Хамзин қатысты. Жеребе қорытындысы бойынша, Дәурен Жарылғапов алғашқы айналымда Замир Хамзинді таза жеңді.

 ⁃ Турнирдің бас жүлдесі – 15 миллион теңге – Ерасыл Қажыбаевқа бұйырды. Жалпы жүлде қоры 27,1 миллион теңгені құрады, оның 3,72 миллион теңгесі жаттықтырушыларға арналған. Жүлде қоры былайша бөлінді: 1-орын – 15 000 000 теңге, 2-орын – 3 300 000 теңге, 3-орын – 1 080 000 теңге. Сонымен қатар, әр жеңіске жеткен белдесу үшін балуандарға 100 000 теңгеден беріледі.