Инновациялық шараларды мемлекеттік қолдау бойынша портал құрылады

Бүгін Мәжілістің жалпы отырысында депутаттар инновациялық қызмет саласын мемлекеттік қолдау жүйесін жетілдіру мәселелері бойынша түзетулерді талқыланып жатыр. Цифрлық даму, инновациялар және аэроғарыш өнеркәсібі министрі Жаслан Мәдиев жаңа заң жобасы туралы айтты, деп хабарлады Elordainfo.kz.
 

«Біздің Заң жобамыз  2024 жылға арналған заң жобалау жұмыстарының жоспары шеңберінде әзірленді.  Ол «Инновациялық технологиялар паркі» қорын қайта ұйымдастыру туралы шешімді іске асыруға бағытталған. Жоба Азаматтық, Кәсіпкерлік кодекстерге және сегіз бейіндік заңға өзгерістер енгізуді ұсынады. Барлық бастамалар төрт негізгі бағыт бойынша жүйеленген»,- деді министр.  

Жаслан Мәдиевтің айтуынша, инновациялық шараларды мемлекеттік қолдау бойынша портал құрылмақ.

«Үшінші блок ұлттық инновациялық жүйенің бірыңғай терезесін дамыту бойынша цифрлық платформаға арналған. Портал AstanaHub.com базасында құрылды және қазір жұмыс жасайды. Оның мақсаты мемлекеттік қолдаудың барлық шараларына қолжетімділікті орталықтандыру. Яғни, ғылым, бизнес, инноваторлар және мемлекетті бір цифрлық алаңда біріктіру болып табылады»,- деді Жаслан Мәдиев.

Министрдің сөзінше, платформа үш негізгі бағыттар бойынша модульдерді қамтиды. Біріншісі – ол мемлекеттік қолдау шаралары. Яғни, инноваторлар бір жерден барлық құралдарға ашық және ыңғайлы қол жеткізе алады. Екінші модуль – технологиялық тапсырмалар. Мұнда, компаниялар сұраныстарды жариялайды. Ал R&D және IT сектор дайын шешімдерді ұсынады. Үшіншісі – бұл инфрақұрылым, зертханаларға, хабтарға, жабдықтарға бірыңғай қолжетімділік. 

«Тағы атап өтетін жай, бүгінгі таңда ғалымдар базасы, мақалалар, аккредиттеу, Ғылыми зерттеу институтттарының паспорттары және гранттар туралы ақпарат бар ғылыми портал жеке іске асырылды. Осылайша, бұл бастама инновациялық жобаның бүкіл өмірлік циклін қамтитын бір терезе болмақ»,- деді Жаслан Мәдиев.