Жаңа жылдық қандай әндер адамға ерекше көңіл күй сыйлайды

Санаулы күндерден соң табалдырықтан жылан жылы аттап, жаңа жылдың ақ парағы ашылады. Мейрам қарсаңында жаңа жылдық әндер адамға ерекше көңіл күй сыйлайды. Жаңа жылдың көркін келтіретін үздік әндер жайында Elordainfo.kz тілшісі «Астана» радиосының музыкалық продюсері Данагүл Әлқожадан сұрап білді.

«Жаңа жыл қарсаңында радиода шырқалатын әндер тыңдармандарымызға мерекелік көңіл күй сыйлауға бағытталған. Эфирде тыңдармандарымыздың сүйікті, көптің құлағындағы жаңа жылдық, қыс туралы және басқа да uplifting (көңіл күйді көтеретін – Ред.) әндер болады. Атап айтар болсақ, Жаңа жылға арналған қазақша әндердің ішіндегі ең танымалы «Жігіттер» квартетінің «Жаңа жыл» әні. Бұл әнді жиі еститін боласыздар. Әлеуметтік желіде Зарина Омарованың «Жаңа жылы» кеңінен қолданылып жүр. Ол да ескерусіз қалмайды. Әлемдік хит Jingle Bells пен Let It Snow-ға да  мерекелік эфирден орын бар.Жанрлар да әрқилы. Баланс сақтау мақсатында жылдам ырғақты ән тыңдарман назарын ұстап отыру үшін баяу әуенмен алмастырылады», - деді музыкалық продюсер.

(Фотоколлаж: Elordainfo.kz)

Көпшілік арасында хитке айналған бұл әндердің шығу тарихы қандай? Бұл сауалды радио қызметкеріне қойған едік.

«О бастан Жаңа жыл қазақтың мерекесі емес. Сол себепті де әндеріміз бұл мереке кеңінен аталып өтетіндіктен жазылды, десек те болады. Ал шет елдік әндерге келетін болсақ, оларда жаңа жылдық атмосфера әуенінен-ақ сезіледі. Себебі Рождество - олар үшін негізгі мейрам. Бірақ бір қызығы, жаңа жылдық болып саналатын шетелдік әндердің бірқатары дәл бұл мейрамға арнап жазылмаған. Мысалы, танымал ABBA тобының Happy New Year әні. Мәтініне зер салсақ, шын мәнінде ол жаңа жылдық кеш дүркіреп өткеннен кейінгі атқан таңға үміт артатындығы туралы «көңілсіз» ән.  Фрэнк Синатраның орындауындағы Lеt it snow әнінің авторлары оны шіліңгір шілдеде, аязды аңсап отырып жазған. Әйгілі Jingle Bells те басқа мерекеге арнап шығарылған. Дегенмен әуезді әуені қалай болғанда да дәл жаңа жылдық көңіл күй сыйлайды», - деді ол.

(Фото: Жасанды интеллект фотоиллюстрациясы)

Сөз соңында Данагүл Әлқожа қазақстандықтарды келе жатқан Жаңа жылмен құттықтап, жылы лебізін білдірді.

«Келер жылда әрбіріміз жаңа белестерді бағындырып, асқақ армандарымыз орындалсын! Қашанда 101.4 толқынында бізбен бірге болыңыздар. «Астана» радиосы Сіздерді жаңа есімдермен таныстырып, 2025 жылы жаңа әндерге жол ашады. Осы жылды қорытындылап, келер жылға жоспар құратын басты мерекені әуезді әуенмен әрлеп, шаттана билеп, жақындарыңызға деген жылы лебіздеріңізді 101.4 толқынында «Астана» радиосымен бірге білдіріңіздер», - деп сөзін түйіндеді «Астана» радиосының музыкалық продюсері Данагүл Әлқожа.

Сабина КӘКІМЖАН