Былтыр 62 мыңнан астам адам қысқа мерзімді кәсіптік оқудан өтті

4 сәуір, 2025
Ернұр Қайнар Ернұр Қайнар
Былтыр 62 мыңнан астам адам қысқа мерзімді кәсіптік оқудан өтті
Фото: Оңалхан Өнерхан

2024 жылы 62,1 мың адам біліктілігін арттыру және жаңа мамандықтарды игеру мақсатында қысқа мерзімді кәсіптік оқудан өтті, деп хабарлады Elordainfo.kz.

Қысқа мерзімді кәсіптік оқыту жұмыссыз азаматтарға бірнеше ай ішінде еңбек нарығында талап етілетін кәсіптік білім мен дағдыларды алуға мүмкіндік береді.

Оқыту оқу ұйымдарында (курстар жұмыс берушілердің сұранысы бойынша ұйымдастырылады), жұмыс берушілердің жұмыс орнында, сондай-ақ сұранысқа ие кәсіптер тізбесі бойынша Skills Enbek қысқа мерзімді оқыту порталында жүргізіледі.

Кәсіптік оқытудың ұзақтығы біліктілік пен дағдылардың ерекшеліктеріне қарай 6 айдан аспайтын мерзімді құрайды.

Өңірлер бөлінісінде оқуға жіберілгендердің ең көп саны Ақтөбе – 11 мың адам, Қостанай – 4,7 мың адам, Жамбыл – 4,5 мың адам, Түркістан облыстарында – 4,1 мың адам және Алматы қаласында – 4,3 мың адам байқалды.

2024 жылы мансап орталықтары оқу ұйымдарында оқуға 7,8 мың адамды жіберді, оның ішінде 6,7 мың адам оқуды аяқтады. Оқу аяқталғаннан кейін 5,9 мың адам жұмысқа орналастырылды.

Жұмыссыздарды жұмыс орнында оқыту жұмыс беруші тарапынан тәжірибелі қызметкерлердің ішінен білікті тәлімгерді бекіте отырып, кәсіпорындар мен ұйымдарда ұйымдастырылады. Оқу кезеңінде жұмыс беруші мен жұмыссыз арасында еңбек шарты жасалады. 20 АЕК мөлшеріндегі жалақыны еңбек мобильділігі орталығы білім алушының шотына тікелей жібереді, - делінген Еңбек және халықты әлеуметтік қорғау министрлігінің ақпаратында.

2024 жылы жұмыс орындарында 1 948 адам оқудан өтті, оның ішінде 1 769 адам оқуды аяқтады. Оқуды аяқтағаннан кейін 1 481 адам немесе 83,7% жұмысқа орналасты.

Былтыр 52,4 мың жұмыссыз Skills Enbek порталы арқылы онлайн курстардан өтті.

Қысқа мерзімді оқытудан өткендер арасында ең сұранысқа ие мамандықтар: тігінші – 1 328 адам, аспаз – 1 090 адам, шаштараз – 805 адам, кондитер – 409 адам, электр-газбен дәнекерлеуші – 289 адам болды.

Естеріңізге сала кетейік, қысқа мерзімді кәсіптік оқудан өту үшін тұрғылықты жері бойынша Мансап орталығына, ал ауылдық жерлерде – кенттердің, ауылдық округтердің, аудандық маңызы бар қалалардың әкімдеріне жүгіну қажет.

Кәсіптік оқудан өтетін азаматтар оқу ақысын төлеу, стипендия не жалақы, жол жүру бойынша мемлекеттік қолдаумен қамтамасыз етіледі.

Тұрғылықты жерінен тыс елді мекенде оқудан өту кезінде білім алушыға тұруға материалдық көмек (тұрғын үй жалдау бойынша шығыстарды өтеу) көзделген.