Лифт шаруашылығын кез келген кәсіпкер жүргізіп жатыр – депутат

Бұл туралы сенат депутаты Бекбол Орынбасаров Премьер-министр Олжас Бектеновке жолдаған депутаттық сауалында айтты, деп хабарлады Elordainfo.kz.
 

«Қолданыстағы заңнамаға сәйкес жүк көтергіш механизмдер мен лифтердің өнеркәсіптік қауіпсіздігіне мемлекеттік бақылау мен қадағалуды жүргізу  жергілікті атқарушы органдардың азаматтық қорғау саласындағы өкілеттіліктеріне жатқызылған. Бірақ лифтерді қауіпсіз пайдалану ережесін әзірлеу, сондай-ақ елге сатып алынып келетін лифтерге рұқсаттаманы беру өнеркәсіптік қауіпсіздік  комитетіннің құзыретінде қалды. Ал автокран, мұнара краны сияқты техникалық жүк көтергіш механизмдерінің жұмысы қауіпті өндіріс ретінде танылып, маңызды функциялар бөлшектеліп, жергілікті атқарушы органдарға мақсатты түрде берілген. Тұрғын үй инспекторының қолынан келетін әрекет бұл нысанға тұрғындардың шағымы бойынша шығу және лифт кабинасындағы жарық жанып тұруы туралы  тексеру парағын толтыру ғана»,- деді Бекбол Орынбасаров.

Сенат депутаты лифт шаруашылығын монтаждауды,баптауды материалдық техникалық базасы жоқ кез келген кәсіпкер жүргізіп жатқанын атап өтті. 

«2024 жылы қарашада Еуразиялық экономикалық  комиссия лифт қауіпсіздігі жөніндегі техникалық регламентті толығымен өзгертті. Жаңа ережеге сәйкес, мерзімі аяқталған барлық лифтерді 2025 жылдың 15-ші ақпанына дейін ауыстыру қажет. Қазақстанда олардың саны 7 мыңға жуық, бірақ нақты саны белгісіз.  Лифтің қызмет ету жылы 25 жыл. Содан кейін көтергішті толығымен ауыстыру керек. Олар адамдар үшін өте қауіпті. Өйткені көптеген өндірушілер жабылды және нарықта ескі лифтерге арналған бөлшектер жоқ. Лифт шаруашылығын  монтаждауды, баптауды материалдық техникалық базасы жоқ кез келген кәсіпкер жүргізіп жатыр. 2014 жылдан бастап лифтерге қызмет көрсететін компаниялардың қызметі де лицензияланбайды. Осыған байланысты нарықта біліктілік талаптарына сәйкес келмейтін көптеген субъектілер пайда болды. Яғни, лифт арқылы көтерілу немесе түсу өте қауіпті десем артық болмайды. Бұл салада да бірнеше адамдардың шығындары болғаны бәрімізге мәлім»,- деді ол. 

Осыған байланысты Бекбол Орынбасаров бірқатар ұсыныс білдірді. 

«Жоғарыда аталғандардың негізінде лифтің көтергіш механизмін қауіпті механизм ретінде тануды және лифт шаруашылығы қызметін техникалық тексеру және қадағалау функцияларын жергілікті атқарушы органдардан төтенше жағдайлар министрлігіне беруді, еліміздегі тұрғын үйлердің ішіндегі лифтердің кепілдік мерзімі өткендерді ауыстыру бойынша жаңа бағдарлама әзірлеуді, орталық мемлекеттік органдарға осы сала бойынша функционалдық міндеттеріне талдау жүргізу үшін арнайы комиссия құруды ұсынамыз»,- деді сенат депутаты.