Астаналық боксшы Азия чемпионатының қола жүлдегері атанды

Таиландтың Бангкок қаласында бокстан жастар арасындағы Азия чемпионаты өтіп жатыр. Бұл – World Boxing федерациясының ұйымдастыруымен өткізіліп жатқан алғашқы құрлықтық біріншілік, деп хабарлады Elordainfo.kz.

Аталған жарыста елордалық былғары қолғап шебері Ақбота Есімбекова жүлделі орыннан көрінді. Жартылай финалда Ақбота Жапония елінің өкілі Аринда Акимотамен жұдырықтасып, қола медаль иеленді.

Сонымен қатар осы турнирде 90 келіге дейінгі салмақта сынға түсіп жатқан тағы бір елордалық спортшы – Темірлан Мұқатаев жарқын жеңіске жетіп, финалға жолдама алды. Ол оңтүстіккореялық Ячан Мунды мерзімінен бұрын айқын басымдықпен жеңді. Темірланның финалдық жекпе-жегі 11 тамыз күні өтеді.

Айта кетейік, жастар арасындағы Азия чемпионатына 26 елден 400-ге жуық спортшы қатысуда. Турнир 11 тамызға дейін жалғасады.