Димаштың Польшадағы жанкүйерлері Қазақстан туралы үстел ойынын құрастырды

Димаш Құдайбергеннің польшалық фан-клубы Наурыз мейрамын бірқатар мерекелік іс-шарамен атап өтті. Ол іс-шаралардың бірі және бірегейі «Димашпен бірге Қазақстанды аралайық» атты үстел ойынының тұсаукесері болды, деп хабарлады Elordainfo.kz dimashnews-ке сілтеме жасап.

Бұл стратегиялық ойын қатысушыларды Димаш Құдайбергеннің туған жеріне саяхат жасауға шақырады. Ойыншылар Қазақстанның керемет жерлеріне барып, қазақ елі мен мәдениеті туралы қызықты деректермен танысады. Іс-шараның басты сыйлығы — Астанадағы гипотетикалық концерт және Димашпен кездесу болады. Ойын поляк және ағылшын тілдерінде қол жетімді және жақын арада қазақ және испан тілдерінде де жарық көреді. Ойынның авторлары: Магдалена Холда, Сильвия Шайтер-Зиулек, Катажина Стшелиньска.

Тұсаукесер нағыз қазақ дастарханын жайған Варшава мультимәдени орталығында өтті. Дастарханға бауырсақ, ірімшік, жент және құрт сияқты дәстүрлі тағамдар қойылды. Барлық тәттілерді жанкүйерлер өздерінің жеке рецебі бойынша дайындалған.

Шараға Қазақстан өкілдері Нұрәлі Омарқұл мен Нұрхан Әбішев қатысып, Наурыз мейрамының тарихымен, оның символдары — «Наурыз көже» тағамы, ұлттық күрес пен ат бәйгелері туралы ақпаратпен бөлісті. Кездесу соңында олар қазақтың әдет-ғұрпы бойынша шашу шашып, қонақтарға молшылық болсын деген ниетпен тәттілер таратты.

Мереке барысында Варшавадағы «Димаш радиосында» қазақ музыкасы мен мерекесінің мәдениетін талқылауға арналған арнайы хабар өтті. Поляк жанкүйерлері Димашпен кездесу сәттерін асыға күтіп, алдағы концерттеріне дайындық үстінде.