Ұландықтар жоғалған екі телефонды иесіне қайтарды

Бұл туралы Ұлттық ұланның баспасөз қызметі мәлімдеді, деп хабарлады Elordainfo.kz.

Бірінші оқиға Есіл ауданында көше тыныштығын қадағалау қызметін атқару кезінде болды. Сағат 21:30 шамасында елордалық құраманың әскери жасағы Достық көшесіндегі патрульдеу бағытында «IPHONE 12 PRO» маркалы телефон тауып алады.

Әскери жасақ бастығы Әділбек Жалғасов пен қатардағы жауынгерлер Владимир Чупраков және Әсет Қанатқалиев бұл туралы патрульдік топ бастығына хабарлап, тез арада иесін іздестіре бастайды. Бірнеше минуттың ішінде ұландықтар телефон иесін анықтап, оқиға орнына келген азаматқа смартфонын қайтарып берді.

«Біз күн сайын қоғамдық тәртіпті сақтау қызметіне кірісеміз. Көбіне патрульдеу бағыттарында жоғалған бағалы заттарды тауып, иелеріне қайтарамыз. Тұрғындар бізге қырағылық үшін алғыс айтады. Біз кез келген жағдайда көмекке келуге дайынбыз», - деді қатардағы жауынгер Әсет Қанатқалиев.

Сондай-ақ, сағат 22:00-де Есіл ауданында ұландықтардан құралған әскери жасақ «Samsung a55» маркалы телефонды тапты. Әскери жасақ бастығы қатардағы жауынгер Айдын Қадырұлы патрульдеуші қатардағы жауынгер Михаил Махненко және Қайырбек Шарифпен бірге патрульдік топтың бастығы Ернар Байғөбековке осы оқиға бойынша баяндап, иесін іздестіреді. 5573 әскери бөлімінің әскери қызметшілері өздерінің қырағылығын көрсете отырып, иесін тауып, телефонын қайтарып берді.