Азаматтар бұрынғыдай медициналық көмек алу құқығын заңда белгіленген көлемде сақтайды – министр

Денсаулық сақтау министрлігінде жаңа Конституция жобасы талқыланды, деп хабарлады Elordainfo.kz министрліктің баспасөз қызметіне сілтеме жасап.

«Жаңа Конституцияның жобасы - болашаққа бағытталған прогрессивті құжат. Негізі адамға бағдарланған. Жобада Қазақстан Республикасы адами капиталдың дамуын мемлекет қызметінің стратегиялық бағыты ретінде мойындайтыны бекітілген», - деп жазылған министрліктің баспасөз қызметі таратқан ақпаратта.

Талқылауға ДСМ Қоғамдық Кеңесінің басшысы Надежда Петухова, Ұлттық нейрохирургия орталығының басқарма төрағасы Серік Ақшолақов, белгілі ғалым, медицина ғылымдарының докторы, профессор, ҚР ҰҒА академигі, Қазақстан репродуктивті медицина қауымдастығының президенті Вячеслав Локшин, белгілі ғалым, профессор Мақсұт Құлжанов, «Қазақстан денсаулық сақтау менеджерлерінің қауымдастығы» РҚБ төрағасы және тең құрылтайшысы Қуаныш Ерғалиев, «Атамекен» ҚР Ұлттық Кәсіпкерлер палатасындағы (ҰКП) медициналық өнеркәсіп және медициналық қызметтер комитетінің төрағасы Нұржан Отарбаев, жетекші мемлекеттік және жеке медициналық ұйымдардың басшылары, бизнес-қоғамдастықтың, сондай-ақ бейінді құрылымдардың өкілдері қатысты.

Азаматтардың денсаулығын сақтауға құқығын бекітетін және оны іске асыру тетіктерін айқындайтын Конституция жобасының 32-бабы басты назарда.

Конституцияның жобасы арқылы жүзеге асырылатын денсаулық сақтау құқығын сақтауды ұсынады:
* «Халық денсаулығы және денсаулық сақтау жүйесі туралы» Заңда — кодексте белгіленген көлемде және тәртіппен азаматтар төлемейтін медициналық көмек алу;
* заңнамада көзделген негіздерде және тәртіппен ақылы медициналық көмек алу.

«Азаматтар бұрынғыдай медициналық көмек алу құқығын заңда белгіленген көлемде сақтайды. Ұсынылған өзгерістер әлеуметтік кепілдіктерді нақтылауға және құқықтық нығайтуға бағытталған», - деп атап өтті Денсаулық сақтау министрі Ақмарал Әлназарова.

Конституцияның жаңа редакциясының жобасы бюджеттен тыс қаражат есебінен медициналық көмекті қаржыландыру көздерін кеңейту сияқты новеллаларды қарастырады.

Бұл денсаулық сақтау жүйесінің тұрақтылығын арттыруға және халыққа медициналық көмек көрсету мүмкіндіктерін кеңейтуге бағытталған.

Конституцияның жобасында азаматтардың денсаулығын сақтауға бағытталған ережелер де бар:
* 7-бап денсаулықты сақтау мақсатында діни ұйымдардың қызметін шектеу мүмкіндігін көздейді;
* 23-бап сөз бостандығы мен ақпарат тарату азаматтардың денсаулығына зиян тигізбеуі керек деп бекітеді.

Жаңа редакция түрлі қаржыландыру көздерін ескере отырып, салалық заңнама деңгейінде барынша икемді реттеуді көздейді.

Академик Вячеслав Локшин медицина ғылымының ұлттық қауіпсіздік пен тұрақты денсаулық сақтау жүйесінің негізгі факторы ретіндегі рөлін атап өтті. Оның айтуынша, жаңа Конституцияның жобасында ғылым мемлекеттің тұрақты дамуының негізі ретінде қарастырылады. Бұл ғылыми білімнің, зерттеулердің және ғылыми кадрлардың көмекші емес, елдің стратегиялық ресурсы екенін мойындауды білдіреді.

«Құжатты дайындау кезінде халықаралық тәжірибе терең зерттелді, онда медициналық көмекке құқық конституциялық кепілдіктер мен салалық реттеудің үйлесімі арқылы да қамтамасыз етіледі. Негізгі заң жобасына ұсынылған өзгерістер денсаулық сақтаудың құқықтық негіздерін нығайтуға, әлеуметтік кепілдіктерді сақтауға және медициналық көмек жүйесінің тұрақтылығын арттыруға бағытталғаны атап өтілді», - деп жазылған ақпаратта.

Бұған дейін Қазақстан Республикасының жаңа Конституциясының жобасы жарияланғанын жаздық.