Түркияда Наурыз мейрамы кеңінен аталып өтті

Ұлыстың ұлы күні – Наурыз мейрамы Наурызнама онкүндігі аясында Түркияда кең көлемде аталып өтті, деп хабарлады Elordainfo.kz.

Іс-шаралар Қазақстанның Анкарадағы елшілігі мен Ыстанбұлдағы Бас консулдығының ұйымдастыруымен өтті және оларға Түркиядағы қазақстандық студенттер мен жергілікті тұрғындар қатысты.

Наурызнама онкүндігінің әр күніне ерекше мән берілді. Көрісу күнін – Бурса, Қайырымдылық күнін – Балыкесир және Маниса, Шаңырақ күнін – Текирдаг, Едирне және Кыркларели, Мәдениет және ұлттық салт-дәстүр күнін – Болу және Дүздже, Ұлттық киім күнін – Зонгулдак және Бартын, Жаңару күнін – Бандырма, Ұлттық спорт күнін – Измир, Ынтымақ күнін – Коджаели, Жыл басын – Чанаккале және Тазару күнін – Ялова қалаларында білім алатын қазақстандық студенттер мерекелік іс-шаралармен таныстырды.

Мерекелік іс-шаралар барысында қазақтың ұлттық дәстүрлері мен мәдениеті кеңінен таныстырылып, қонақтар наурыз көже, бауырсақ және басқа да дәстүрлі тағамдардан дәм татты. Сондай-ақ жиналғандар үшін қазақтың ұлттық әндері мен күйлері шырқалып, ұлттық би қойылымдары көрсетілді.

Наурыз мейрамын атап өту аясында қазақтың ұлттық ойындары ұйымдастырылып, қазақ және түрік халықтарының достығын дәріптейтін мәдени-танымдық бағдарламалар ұсынылды. Іс-шаралардың басты мақсаты екі ел арасындағы мәдени-гуманитарлық байланыстарды нығайту және қазақ халқының дәстүрлерін шетелде кеңінен насихаттау болды.