Іздеу 
Ақтөбе облысында қауіпті той кортежіне қатысқандар жауапқа тартылды
Жібек Наурыз
Ақтөбе облысында әлеуметтік желілерге жүргізілген мониторинг барысында полиция қызметкерлері үйлену тойына арналған автокөліктер кортежінде жол қозғалысы ережелерінің өрескел бұзылғанын көрсететін бейнежазбаны анықтады, деп хабарлайды Elordainfo.kz ІІМ баспасөз қызметіне сілтеме жасап.
Бейнематериалда көлік қозғалысы кезінде жолаушылардың автокөлік терезелерінен денелерін шығарғаны, жүргізушілердің рөлде телефон пайдаланғаны және қауіпсіздік белдігін тақпағаны көрінеді. Мұндай әрекеттер жол қозғалысының өзге де қатысушыларының өмірі мен денсаулығына нақты қауіп төндіреді.
«Бейнежазба зерделеніп, Мұғалжар аудандық полиция бөлімінің қызметкерлері кортежге қатысқан көлік жүргізушілері мен жолаушылардың барлығын анықтады. Құқық бұзушылық жасаған азаматтардың барлығы қолданыстағы заңнамаға сәйкес әкімшілік жауапкершілікке тартылды. Сондай-ақ көліктердің бірі арнайы тұраққа қойылды», - делінген хабарламада.
Полиция жүргізушілерді жол қозғалысы ережелерін қатаң сақтауға, көлік басқару кезінде ұялы телефон пайдаланбауға және қауіпсіздік белдігін тағуға шақырады. Жолаушылар да қауіпсіздік талаптарын сақтап, өз әрекеттерімен жол қозғалысына қауіп төндірмеуі тиіс.
«Той – қуаныштың көрінісі. Алайда мерекелік көңіл-күй жолдағы қауіпсіздік талаптарын екінші орынға ысыруға себеп болмауы керек», - дейді ІІМ өкілдері.
Еске салайық, бұған дейін Қарағандыда жол ережесін өрескел бұзған бес көлік айып тұрағына қойылғаны туралы жаздық.
