Қазақстанның екі мұрасы ЮНЕСКО-ның «Әлем жады» өңірлік тізіміне енгізілді

Қазақстанның екі тарихи-мәдени мұрасы ЮНЕСКО-ның «Әлем жады» бағдарламасының Азия-Тынық мұхиты өңірлік тізіліміне енгізілді, деп хабарлайды Elordainfo.kz Мәдениет және ақпарат министрлігінің баспасөз қызметіне сілтеме жасап.

Тізімге «Есік жазуы: Есік қорғанынан табылған күміс тостағандағы түркі руна жазуы» және «Мәшһүр Жүсіп Көпеевтің баспа басылымдары жинағы» енді.

Тиісті шешім 5 қарашада Индонезияның Джакарта қаласында өткен ЮНЕСКО-ның «Әлем жады» бағдарламасы Азия және Тынық мұхиты өңірлік комиссиясының (MOWCAP) отырысында қабылданды.

Министрліктің мәліметінше, қос мұраның өңірлік тізілімге енгізілуі Қазақстанның тарихи-мәдени құндылықтарын халықаралық деңгейде танытуға және олардың маңызын кеңінен насихаттауға мүмкіндік береді.

Еске сала кетейік, бұдан бұрын ҚР Мәдениет және ақпарат министрлігінің ЮНЕСКО-мен ынтымақтастық туралы келісім жасасқаны хабарланған еді.