Елордада 1,6 млрд теңге жымқырған кәсіпорын басшылары сотталды

Астана қаласының мамандандырылған ауданаралық қылмыстық істер жөніндегі соты мемлекеттік қорғаныс тапсырысы саласындағы қаражат жымқыру дерегі бойынша резонанстық істі қарауды аяқтады, деп хабарлады Elordainfo.kz Қаржылық мониторинг агенттігіне сілтеме жасап. 

Еске сала кетейік, 2023 жылы Қаржылық мониторинг агенттігі «Казспецэкспорт» республикалық мемлекеттік кәсіпорнының басшылары мен кейбір жеткізушілерді ұстаған. Оларға әскери мақсаттағы өнімдерді сатып алуға бөлінген қаржыны заңсыз иемденді және сыбайлас жемқорлыққа барды деген айып тағылған болатын.

Тергеу нәтижесінде мемлекетке келтірілген шығын көлемі 1,6 миллиард теңгеден асқаны анықталды.

«Сот үкімі бойынша «Казспецэкспорт» РМК бас директоры Рамазанов А.К. 11 жылға, ал департамент директоры Кудабаев А.Т. 10 жылға бас бостандығынан айырылды. Қалған 9 адам да түрлі мерзімге сотталды»,- делінген хабарламада.

Сонымен қатар, сот мемлекет пайдасына 1,6 миллиард теңге көлеміндегі азаматтық талап-арызды қанағаттандырып, жалпы құны 607 миллион теңге болатын мүлікті тәркілеуге шешім шығарды.

Аталған үкім әлі заңды күшіне енген жоқ.