Жанат Айтова: Ата заң білім алуға тең қолжетімділікті қамтамасыз етеді

Биыл Қазақстан Республикасының Конституциясына 30 жыл толып отыр. Ел дамуының негізі саналатын құжатта адам құқықтары мен бостандықтары, соның ішінде білім алу құқығы нақты әрі айқын көрсетілген. Елордадағы №103 орта мектеп директоры бұл мүмкіндіктер балаларға сапалы әрі қауіпсіз білім алу үшін жағдай жасайтынын айтты, деп хабарлады Elordainfo.kz.

«Қазақстан Республикасының Конституциясы – әрбір азаматтың, соның ішінде баланың да негізгі құқықтары мен бостандықтарын қамтамасыз ететін басты құжат. Конституцияның 30-бабына сәйкес, елімізде орта білім тегін әрі міндетті. Соның нәтижесінде барлық балалар мектепте тегін білім алады. Мысалы, «Білім туралы» заңда ерекше білім беру қажеттілігі бар балаларға қатысты құқықтар мен кепілдіктер айқын көрсетілген. Конституция негізінде балалардың тең құқылығына және дискриминацияға жол бермеуге бағытталған жалпы нормалар бар, олар ерекше білім беру қажеттіліктері бар балаларды қорғауға негіз болып отыр», - дейді Жанат Айтова.

Елордалық мектеп директоры бұл бап ерекше қажеттіліктері бар балаларға білім беру саласында тең мүмкіндік беруді талап етенін атап өтті.

«Қазіргі таңда мектебімізде ерекше білім беруді қажет ететін 46 оқушы оқиды. Олардың ішінде 9 оқушы үйден оқытылса, 26 оқушыға педагог-ассистенттер қолдау көрсетеді. Биыл 11 ерекше бала 1-сыныпқа қабылданды. Сонымен қатар мектепте инклюзивті білім беруге жағдай жасалған. Оның ішінде 5 арнайы кабинет жұмыс істейді, сондай-ақ балалардың мектепке кедергісіз кіріп-шығуы үшін 5 пандус орнатылған», - дейді ол.

Жанат Тұрысбекқызы оқу үдерісімен қатар, балалардың қауіпсіздігін қамтамасыз ету де басты назарда екенін айтты.

«Мысалы, Конституцияның 27-бабында «Қазақстан Республикасында әркімнің өмірі мен денсаулығы заңмен қорғалуға тиіс» деп жазылған. Бұл норма балаларға да қатысты және олардың өмірі мен денсаулығын қорғауды қамтиды. Президентіміздің қолдауымен білім беру ұйымдарында қауіпсіздік жүйелері жаңғыртылып, кеңейтіліп жатыр. Осы мақсатта мектебімізде жалпы саны 193 бейнебақылау камерасы орнатылған, олардың 152-сі мектептің ішінде, ал 41-і мектеп аумағында орналасқан. Бұл жүйе білім алушылардың қауіпсіздігін тәулік бойы бақылауға, оқыс оқиғалардың алдын алуға мүмкіндік береді. Жалпы бұл мүмкіндіктердің барлығы Конституцияда бекітілген бала құқығының, атап айтқанда, сапалы білім алуға тең қолжетімділіктің нақты жүзеге асқанын көрсетеді», - дейді Жанат Айтова.