Агроөнеркәсіптік кешендегі сақтандыру сыйақыларын субсидиялау бойынша өтінім қабылдау басталды

Фото: pexels.com

«Аграрлық несие корпорациясы» АҚ агроөнеркәсіптік кешендегі сақтандыру сыйақыларын субсидиялау бағдарламасы бойынша өтінім қабылдау басталды. Фермерлер өтінімдерді АӨК-тегі сақтандырудың ақпараттық онлайн жүйесі арқылы, Kezekte.kz платформасында бере алады, деп хабарлайды Elordainfo.kz АШМ баспасөз қызметіне сілтеме жасап.

2026 жылғы 16 сәуірден бастап ауыл шаруашылығы тауар өндірушілері өсімдік және мал шаруашылығы салаларындағы ерікті сақтандыру шарттары бойынша мемлекеттік қолдауға өтінім бере алады. Бұл тетік фермерлердің сақтандыру шығындарын едәуір азайтып, тәуекелдерді басқаруға мүмкіндік береді.

Алайда өтінім қабылдау мерзімі шектеулі. Жаздық дақылдарды сақтандыруға өтінімдер 2026 жылғы 30 маусымға дейін, ал көпжылдық екпелер бойынша – 31 қазанға дейін қабылданады.

Бағдарлама аясында аграрийлер жаздық дақылдардың егістіктерін топырақтағы артық ылғалдан, көпжылдық екпелерді, соның ішінде алма бақтарын, сондай-ақ ауыл шаруашылығы жануарларын – ірі және ұсақ малды, жылқы, шошқа мен құсты сақтандыра алады.

Бағдарламаның басты артықшылығы – мемлекеттік қолдаудың жоғары деңгейі: сақтандыру сыйақысының 80 пайызы бюджет есебінен субсидияланады, ал қалған 20 пайызын шаруалар өз қаражаты есебінен төлейді.

Бұған дейін шаруаларға дала жұмыстары үшін 612 млрд теңге көлемінде жеңілдетілген несие берілгенін жаздық.