Қызылорда облысында 9 жыл бойы алимент төлемеген әке сотталды

Қызылорда облысында алимент төлемеген ер адамға жаза тағайындалды, деп хабарлады Elordainfo.kz облыстық прокуратураға сілтеме жасап.

Сырдария аудандық прокуратурасы 9 жыл бойы балаларына алимент төлемеген азаматқа қатысты тергеу жүргізді. Ол адам төлеуге мүмкіндігі бола тұра, 2016 жылдан бері алимент төлеуден жалтарып келген. Осы уақыт ішінде жиналған қарыз сомасы 8 173 713 теңгені құрайды. 

Аталған іс бойынша ҚР Қылмыстық кодексінің 139-бабы (Алимент төлеуден жалтару) бойынша іс қозғалды.

2025 жылғы 26 мамырда Қызылорда облысының кәмелетке толмағандар істері жөніндегі мамандандырылған ауданаралық соты азаматты кінәлі деп танып, оған 1 жыл мерзімге бас бостандығын шектеу жазасын тағайындады.

Үкім заңды күшіне енген жоқ.