Екі облыста топтық жазатайым оқиғаларға тергеу жүргізіліп жатыр

Мемлекеттік еңбек инспекциясы комитетінің Қарағанды және Қостанай облыстары бойынша аумақтық департаменттері өңірлердегі жалпы саны 6 адам қаза тапқан топтық жазатайым оқиғаларды тергеу үшін арнайы комиссиялар құрды, деп хабарлады Elordainfo.kz ҚР Еңбек және халықты әлеуметтік қорғау министрлігіне сілтеме жасап.

Тергеу нәтижесінде орын алған қайғылы оқиғалардың мән-жайлары мен себептері анықталады.

«2024 жылдың 5 қазанда сағат 19:30-да «Қазақмыс корпорациясы» ЖШС «Саяқ» кенішінің аумағында «Балқаштүстіметалл» ӨБ-де тау-кен шебері Д.Игембаев (1990 ж.т.), теспе бұрғылаушы О. Зекей (1967 ж.т.) және бұрғылаушының көмекшісі М.Тұрыспаев (2001 ж.т.) белгісіз газбен уланған.

Жазатайым оқиға салдарынан Д. Игембаев пен М. Тұрысбаев қаза тауып, О. Зекей Балқаш қаласындағы қалалық ауруханаға жіберілді», - делінген хабарламада.

Жазатайым оқиғаның мән-жайлары мен себептерін тергеп-тексеру үшін Қарағанды облысы бойынша бас мемлекеттік еңбек инспекторының төрағалығымен арнайы комиссия құрылды.

«2024 жылдың 6 қазанында Рудный қаласында «Imperial Agro Group» ЖШС жалға алған диірмен кешенінің аумағында № 5 ұн бункерінен төменде көрсетілген азаматтардың мәйіттері табылды: Е. Бошыков (1987 ж.т.), А. Өтегенов (1994 ж. т.), Д. Калауов (1978 ж. т.), С. Шакиртаева (1976 ж. т.).

«Imperial Agro Group» ЖШС басшысының ақпараты бойынша, Е. Бошықов іске қосу-реттеу жұмыстары бойынша технолог ретінде азаматтық-құқықтық сипаттағы шарт бойынша қызметтер көрсеткен. ЖШС директоры өзге қайтыс болған азаматтар туралы білмейді, өйткені аталған адамдармен еңбек қатынастары болмаған», - деп жазылды оқиға туралы хабарламада.

Болған оқиғаның барлық мән-жайларын анықтау және аталған азаматтармен еңбек қатынастарының болуын немесе болмауын анықтау үшін Мемлекеттік еңбек инспекциясы комитетінің Қостанай облысы бойынша департаменті комиссия құрды.