Астанада күзгі ауылшаруашылық жәрмеңкелері  жалғасып жатыр

Осы демалыс күндері Астана тұрғындарына Абай және Атырау облыстарының тауар өндірушілері өз өнімдерін ұсынады, деп хабарлады Elordainfo.kz. 

«Абай және Атырау облыстарының аграршылары ет, балық, сүт, азық-түлік өнімдерін, сондай-ақ көкөністер мен жемістерді тікелей фермерлерден алады, бұл азық-түліктің қолжетімділігін арттыруға да, отандық өндірушіні қолдауға да ықпал етеді. Бүгінде өңірлердің тауар өндірушілері 400 тоннаға жуық өнім ұсынды. Оның ішінде 140 тонна ет және ет өнімдері, 80 тонна көкөністер мен жемістер бар. 70 тонна бал, 50 тонна бақша өнімдері, 25 тонна балық, 15 тонна сүт және 20 тоннаға жуық өзге де азық - түлік өнімдері, - деді Астана қаласы Инвестициялар және кәсіпкерлікті дамыту басқармасының азық-түлік қауіпсіздігі бөлімінің басшысы Дархан Отызбаев. 

Жәрмеңкеге келушілердің пікірінше, Абай облысының өнімдері экологиялық таза, ал Атырау тауарларының арасында балық ерекше сұранысқа ие. 
 

«Бүгін мен мұнда арнайы балық алу үшін келдім. Мұнда сазан, тұқы, асшаяндар бар. Дәмді, экологиялық таза, сапа жағынан да, баға жағынан да таңдау бар. Жәрмеңке саудаласуға да жақсы, - деп өз ойымен бөлісті астаналық Ирина. 

Естеріңізге сала кетейік, жәрмеңкелер сенбі және жексенбі күндері «Қазанат» ипподромының (Қарқаралы тас Жолы1) тұрақ аумағында сағат 9.00-ден 18.00-ге дейін өтеді.   Бұл бағытқа № 18,37, 303 автобус маршруттары қатынайды. 

Максим Удод