Қазақстан мен Қатар қылмысқа қарсы күрестегі ынтымақтастықты нығайтады

Фото: Қорғаныс министрлігінің баспасөз қызметі

Құрылтай «Қазақстан Республикасының Үкіметі мен Қатар Мемлекетінің Үкіметі арасындағы қылмысқа қарсы күрестегі ынтымақтастық туралы келісімді ратификациялау туралы» заңды екі оқылымда қабылдады. Келісім 2024 жылғы 29 қазанда Доха қаласында жасалған, деп хабарлайды Elordainfo.kz Құрылтайдың баспасөз қызметіне сілтеме жасап.

Құжат ұйымдасқан қылмысқа, террористік және экстремистік қылмыстарға, есірткінің, психотроптық заттар мен олардың прекурсорларының заңсыз айналымына, заңсыз көші-қонға және адам саудасына қарсы күрес, сондай-ақ ақпараттық қауіпсіздік саласындағы міндеттерді шешу кезінде Қазақстан мен Қатар арасындағы өзара іс-қимыл мәселелерін реттейді.

Ынтымақтастық екі мемлекеттің құзыретті органдарының сұрау салулары негізінде жүзеге асырылады.

Тараптар қылмыстық іс қозғалғанға дейін жедел ақпарат алмаса алады, іздеудегі адамдар туралы деректерді жедел салыстырып тексереді.

Сондай-ақ бірлескен оқу-жаттығулар өткізу, технологиялар алмасу, киберқылмысқа және ақшаны жылыстатуға қарсы күрес саласындағы мамандардың біліктілігін арттыру көзделген.

Бұған дейін ішкі істер министрінің орынбасары Санжар Әділов депутаттың «шетелдік құқық қорғау органдары қазақстандықтардың деректер базасына тікелей кіре ала ма?» деген сауалына жауабын ұсынғанбыз.

Әлеуметтік желілерді бөлісіңіз