Іздеу 
Жібек Наурыз
«Тұран-Астана» университетінде 9–16 қараша аралығында білім алушылардың құқықтық мәдениетін қалыптастыруға, жастардың құқықтық сауаттылық деңгейін арттыруға, құқық бұзушылықтардың алдын алуға және заңға деген құрмет сезімін тәрбиелеуге бағытталған «Заң және тәртіп» онкүндігі өткізіліп жатыр, деп хабарлайды Elordainfo.kz университеттің баспасөз қызметіне сілтеме жасап.
Ұйымдастырушылардың айтуынша, онкүндік аясында студенттердің құқықтық санасын арттыруға және белсенді азаматтық ұстанымын қалыптастыруға бағытталған ақпараттық-ағартушылық және профилактикалық іс-шаралар кешені жоспарланған.
«Онкүндік бағдарламасына құқық қорғау органдары мен заң қоғамдастығы өкілдерімен тақырыптық кездесулер, дөңгелек үстелдер, дәрістер, семинарлар, құқықтық викториналар, пікірталас алаңдары және ақпараттық акциялар енді.
Атап айтқанда, «Құқық және психология» кафедрасының доценті, заң ғылымдарының кандидаты Серімов Өмірзақ Серімұлының «Кәмелетке толмағандар мен жастар арасындағы қылмыс пен құқық бұзушылық мәселелері» тақырыбында ашық дәрісі өткізіледі. Іс-шара жастар арасындағы қылмыстылықтың қазіргі жай-күйін кешенді талдауға, оның себеп-салдарлық байланыстарын зерттеуге, сондай-ақ оның алдын алудың тиімді тетіктерін әзірлеуге бағытталған», - делінген хабарламада.
Сонымен қатар, онкүндік барысында заңнаманы сақтау, құқық бұзушылықтардың алдын алу, буллинг пен кибербуллингке, интернет-алаяқтыққа, нашақорлыққа, сыбайлас жемқорлыққа қарсы іс-қимыл, сондай-ақ жеке және қоғамдық қауіпсіздік мәселелеріне ерекше назар аударылады.
«Заң және тәртіп» онкүндігін өткізу студенттердің құқықтық білімін нығайтуға, өз іс-әрекеттеріне жауапкершілікпен қарауды қалыптастыруға және университетте қауіпсіз әрі қолайлы білім беру ортасын құруға ықпал етпек.
«Тұран-Астана» университетінде қылмыстық көріністерге, оның ішінде кәмелетке толмағандар арасындағы қылмыс пен құқық бұзушылықтарға тиімді қарсы іс-қимыл жасауға мүмкіндік беретін заманауи криминалистикалық құралдардың, мамандандырылған техниканың және жасанды интеллект саласындағы озық жетістіктердің толық кешені бар екенін атап өтеміз», - дейді университет өкілдері.
Университеттің арсеналында қылмыс іздерін анықтауға, тіркеуге, алуға және іс материалдарына тіркеуге арналған заманауи техникалық-криминалистикалық құралдар бар. Оқу үдерісі мен ғылыми-практикалық база тергеу әрекеттерін жүргізудің криминалистикалық тактикасының және қылмыстың жекелеген түрлерін тергеу әдістемесінің барлық негізгі бағыттарын, соның ішінде кәмелетке толмағандар жасаған құқық бұзушылықтарды тергеу ерекшеліктерін қамтиды.
