Өтініштерден нақты шешімдерге дейін: қоғамдық мүдделер қалай қорғалады

2026 жылдың жеті айында «Байқоңыр» ауданының прокуратурасы 4 мыңнан астам адамның құқықтарын қорғады. Басым бағыттардың қатарында азаматтардың, кәсіпкерлердің және кәмелетке толмағандардың құқықтарын қорғау, сот шешімдерінің орындалуын қамтамасыз ету және құқық бұзушылықтардың алдын алу бар. Бұл туралы Астана қаласы Байқоңыр ауданы прокуратурасының қоғамдық мүдделерді қорғау бөлімінің бастығы Олжас Бекетов Астана қаласы коммуникациялар қызметі алаңында мәлімдеді, деп хабарлайды Elordainfo.kz Астана қаласы коммуникациялар қызметі баспасөз қызметіне сілтеме жасап. 

Азаматтардың өтініштерімен жұмыс

Жыл басынан бері аудан прокуратурасының жеке қабылдауында 178 азамат болды. Негізгі мәселелер еңбек және әлеуметтік құқықтарға, тұрғын үйге, сот шешімдерінің орындалуына, алимент өндіруге және кәсіпкерлердің мүдделерін қорғауға қатысты болды.

Мәселен, аудан тұрғынының демалыс ақысын төлемеу туралы өтінішінен кейін прокуратура тиісті шаралар қабылдап, нәтижесінде жұмыс беруші барлық төлемдерді жүргізді. Тағы бір жағдайда кәсіпкер мемлекеттік сатып алу шарттары бойынша берешектің төленбеуіне байланысты жүгінді. Прокуратураның араласуынан кейін берешек толық көлемде өтелді.

Прокуратура азаматтарға өтініштерді дайындау кезінде практикалық көмек көрсетіп, бұзылған құқықтарды қорғау тәртібін түсіндіреді.

Жеке қабылдау күн сайын 09:00-ден 18:30-ға дейін жүргізіледі.

Кәсіпкерлерді қорғау

Бизнес субъектілерінің құқықтарын қорғауға ерекше назар аударылады. Есепті кезеңде 460 кәсіпкердің құқықтары қорғалған.

Атап айтқанда, прокуратура кәсіпкерлік қызметке кедергі келтіретін заңсыз шектеулерді жою бойынша шаралар қабылдайды.

Кәсіпкерлердің бірінің өтініші бойынша нысанды пайдалануға беру рәсімдеуге байланысты кедергі жойылып, жобаны іске асыруды жалғастыруға мүмкіндік берілді.

Балалардың құқықтарын қорғау және алимент өндіру

Кәмелетке толмағандардың құқықтарын қорғау ерекше орын алады. Жыл басынан бері қабылданған шаралардың нәтижесінде балалардың пайдасына 31 млн теңгеден астам алимент өндірілді.

Борышкерлерге әкімшілік және қылмыстық жауапкершілік шаралары қолданылды. Қазақстан Республикасы Қылмыстық кодексінің 139-бабына сәйкес, кәмелетке толмаған балаларды асырауға арналған қаражатты төлеу туралы сот шешімін үш айдан астам орындамағаны үшін қылмыстық жауапкершілік көзделген.

Сонымен қатар прокуратура сот шешімдерінің орындалуын қамтамасыз ететін тұлғалардың қызметіне қадағалау жүргізеді. Жүйелі бұзушылықтарға жол берген жеке сот орындаушысына қатысты лицензиясынан айыру мәселесі бастамашылық етілді.

«Заң және Тәртіп»

Құқық бұзушылықтардың алдын алу және «Заң және Тәртіп» қағидатын ілгерілету маңызды бағыттардың бірі болып қала береді.

Прокуратура халықпен кездесулер өткізіп, заңнаманы түсіндіреді, бұқаралық ақпарат құралдарымен өзара іс-қимыл жасайды және азаматтардың құқықтық сауаттылығын арттыру үшін әлеуметтік желілерді пайдаланады.

Басты міндет – жасалған құқық бұзушылықтарға ғана әрекет ету емес, олардың алдын алу.

«Байқоңыр» ауданының прокуратурасы азаматтардың, кәсіпкерлердің және инвесторлардың құқықтарын қорғау жөніндегі жұмысты жалғастырады. Құқықтары бұзылды деп есептейтін әрбір тұрғын прокуратураға жүгініп, заңда белгіленген өкілеттік шегінде қажетті түсіндірме мен құқықтық көмек ала алады.

Еске салайық, бұған дейін елордада қоғамдық мүдделерді қорғаудағы жартыжылдық нәтижелері қорытындыланғаны туралы жаздық.