ІІМ көлік жүргізушілерін даярлау курстарына қатысты мәлімдеме жасады

Фото: Ішкі істер министрлігі

Ішкі істер министрлігі интернет пен әлеуметтік желіде жүргізушілерді жедел онлайн курстар арқылы даярлау жөнінде таралып жатқан ұсыныстарға байланысты ресми түсіндірме жасады, деп хабарлады Elordainfo.kz.

Ведомствоның мәліметінше, болашақ жүргізушілер автомектепте толық оқу курсынан өтуі тиіс. Бұл курстың құрамына міндетті түрде практикалық сабақтар кіреді. Жүргізу дағдысын тек онлайн форматта толық меңгеру мүмкін емес.

ІІМ Әкімшілік полиция комитеті төрағасының орынбасары Әлібек Кеңіспаевтың айтуынша, жүргізу дағдысы нақты жол жағдайында ғана қалыптасады. Онлайн курстар толыққанды оқытуды алмастыра алмайды.

Сондай-ақ министрлікте автомектепті аяқтағанын растайтын қағаз түріндегі куәлікті алу талап етілмейтіні атап өтілді. Оқу туралы мәліметтер арнайы ақпараттық жүйелер арқылы халыққа қызмет көрсету орталықтарына электронды түрде жолданады.

ІІМ өкілдері жүргізушілерді даярлау сапасы жол қауіпсіздігіне тікелей әсер ететінін ескертеді. Осыған байланысты азаматтарды оқу мәселесіне жауапкершілікпен қарап, күмәнді әрі заң талаптарына сай келмейтін ұсыныстарға сенбеуге шақырады.

Еске салайық, бұған дейін Ақтауда мас күйде рульде отырып үш көлікті соққан ресейлік 20 тәулікке қамалғаны туралы жаздық.