Елімізде 2026 жылы 121 спорт нысаны пайдалануға беріледі

Фото: freepik.com

Биыл республика бойынша 121 спорт нысанын пайдалануға беру жоспарланып отыр, деп хабарлады Elordainfo.kz Туризм және спорт министрлігіне сілтеме жасап.

Мәселен, биыл Тараз қаласының Ұлы Дала шағын ауданында дене шынықтыру-сауықтыру кешені, Қызылорда қаласында «Қызылорда Арена» спорт кешені, Жаңаөзен қаласында 160 орындық дене шынықтыру-сауықтыру кешені пайдалануға беріледі.

Сонымен қатар, Астанада Қажымұқан Мұңайтпасов атындағы стадионның құрылысы аяқталады деп күтілуде. Нысанды пайдалануға беру мерзімі – 2026 жылдың бірінші тоқсаны. Ал Алматы қаласында Медеу мұз айдынын қайта жаңғырту жұмыстары жоспарға сәйкес жүргізіліп жатыр.

«Бұл жобалар халықтың бұқаралық спортпен айналысуына қолайлы жағдай жасап, кәсіби спортты дамытуға серпін беруге бағытталған», - делінген хабарламада.

Айта кетейік, 2025 жылы елімізде 147 спорт нысаны пайдалануға берілген. Аталған нысандардың 100-ден астамы ауылдық жерлерде, ал 40-қа жуығы қалалық аймақта салынды. Ірі жобалар қатарында Түркістан қаласындағы ескек есу арнасы мен Қызылордадағы «Қайсар Арена» стадионы бар.

Еске салайық, бұдан бұрын бүгін қысқы Олимпиаданың салтанатты ашылу рәсімі өтетіні туралы хабарладық.