Су саласының 500-ден астам қызметкері біліктілікті арттыру курстарынан өтті

Су ресурстары және ирригация министрлігі биыл су саласы мамандықтарының тартымдылығын арттыру үшін бірқатар іс-шараларды жүзеге асырды, деп хабарлады Elordainfo.kz.

Мәселен, «Болашақ» бағдарламасына өзгерістер енгізіліп, оған су саласының мамандықтары қосылды. Нәтижесінде қазақстандық студенттер аталған мамандықтар бойынша шетелде білім алу мүмкіндігіне ие болды.

«Су шаруашылығы саласына жас мамандарды тарту және қызметкерлердің біліктілігін арттыру – министрлік жұмысының басым бағыттарының бірі. Биыл 9 жоғары оқу орнымен ынтымақтастық туралы меморандумға қол қойды. Осының нәтижесінде, 80 студент «Қазсушар» филиалдарында өндірістік тәжірибеден өтті. Бұдан бөлек, шетелдік әріптес университеттермен қос дипломдық және бірлескен білім беру бағдарламаларын дамыту жөнінде іс-шаралар қабылданады», - деді ҚР СРИМ Ғылым және инновациялар департаментінің директоры Мүслім Жиенбаев.