Енді көліктің терезесінен басын шығарғаны үшін айыппұл салынады

Бұл туралы «Жол қауіпсіздігі саласындағы заңнамадағы өзгерістер туралы» өткен брифингте ІІМ әкімшілік полиция комитетінің төрағасы Қайсар Сұлтанбаев айтты, деп хабарлады Elordainfo.kz.

«13 наурыздан бастап Әкімшілік кодекске өзгерістер енгізілді. Автомобиль қозғалысы кезінде көліктен бас шығару нормасы ең алдымен жолаушылардың өмірі мен денсаулығының қауіпсіздігіне бағытталған. Бұрын мұндай норма болмаған. Өздеріңіз білесіздер, кейде жастар көліктен бастарын шығарып қауіпті жағдай тудырады. Осыған байланысты заңға өзгеріс енгізілді»,- деді Қайсар Сұлтанбаев.

ІІМ өкілі енді көліктің терезесінен басын шығарғаны үшін айыппұл салынатынын айтты.

«Мектеп бітіру кештері мен үйлену тойлары кезінде көптеген адамдар өз қауіпсіздіктеріне мән бермей, осындай әрекеттер жасап отырады.  Енді жүріп келе жатқан көліктің терезесінен басын шығарғаны үшін 10 АЕК (39,3 мың теңге) көлемінде айыппұл салынады. Бұл ретте жауапкершілік жолаушыға да жүргізушіге де тең дәрежеде әсер етеді»,- деді ол.