Үнзила Шапақ: Бұл — ел тарихындағы маңызды күн

Биыл еліміздің Ата Заңы қабылданғанына 30 жыл толып отыр. Конституция — мемлекет пен қоғам арасындағы өзара қатынасты реттейтін, азаматтардың құқықтары мен бостандықтарын айқындайтын басты құжат. Парламент Мәжілісінің депутаты Үнзила Шапақтың айтуынша, Конституция – бұл халық пен билік арасындағы қоғамдық келісім. Әртүрлі әлеуметтік топтардың ортақ мүддесін біріктіретін құқықтық негіз ретінде ол мемлекеттің тұрақтылығын қамтамасыз етеді.

«Әлем елдерінде азаматтық қоғамның қалыптасуы Конституциядан басталады. Мәселен, АҚШ, Франция, Германия секілді елдердің Конституцияларын озық үлгі ретінде қарастырамыз. Қолданыстағы Ата Заңды «халық Конституциясы» деп атаймыз, себебі онда елдің мақсат-мүддесі, әлеуметтік-құқықтық мемлекет орнату жолы нақты жазылған», – деді депутат.

Депутаттың мәліметінше, әлем бойынша 200-ден астам елдің көпшілігінде Конституция бар. Тек 10-15 пайыз мемлекетте бұл құжат мүлде жоқ.

«Конституция – уақыт талабына сай өзгеріп, жаңарып отыратын құжат. Алғаш рет 1995 жылы Парламент арқылы өзгерістер енгізілсе, 2022 жылы бүкілхалықтық референдум нәтижесінде тағы да маңызды түзетулер жасалды. Соның бірі — депутаттардың бір мандатты округтер арқылы сайлануы. Сонымен қатар елімізде Конституциялық Сот құрылып, азаматтарға тікелей жүгіну мүмкіндігі берілді. Бұл — бұрын-соңды болмаған жаңа қадам», - деп атап өтті Үнзила Шапақ.

Ол Ата Заңымыздың заман талабына сай жаңарып, өзектілігін жоғалтпауы демократиялық қоғам дамуының кепілі екенін айтты.

«Ата Заң  — әрбір азамат үшін қастерлі құндылық. Бұл — ел тарихындағы маңызды күн. Елімізде заң үстемдігі мен құқықтық тәртіп орнасын деп тілеймін. Баршаңызды Конституция күнімен құттықтаймын!» - деді депутат өз сөзінде.