Елордада тұрмыстық қылмыс азайды

Әкімдік мәліметінше, соңғы 5 айдың қорытындысы бойынша қылмыстарды тіркеу шамамен 40%-ға төмендеді. Нұр-Сұлтан қаласы полиция департаменті жергілікті полиция қызметінің бастығы Арман Айтмағамбетов осылай деп мәлімдеді. Оның айтуынша, алдын алу жұмыстарын күшейту нәтижесінде мас күйіндегі қылмыстар 37,7%-ға төмендеген. Қылмыс деңгейі 10 мың тұрғынға шаққанда 40,2%-ға азайған. «Пандемия жағдайында халықтың өмір салты түбегейлі өзгерді. Әлеуметтік байланыстардың төмендеуі, қаржылық жағдайдың нашарлауы адамдардың психологиялық жағдайына теріс әсер етті. Маскүнемдік салдарынан отбасылық және өзге адамдармен қақтығыстар туындады. Біз есепте тұрғандармен (маскүнемдер – 1 081, нашақорлар – 400, отбасылық жанжалдар – 3388) профилактиканы күшейттік, маскүнемдік (183) және нашақорлық (72) бағыты бойынша жұмысты жалғастырудамыз», - деді Айтмағамбетов. Маманның айтуынша тұрмыстық құқық бұзушылықтар үшін 849 адам жауапқа тартылды, жәбірленушілерді қорғау үшін 3388 қорғау ұйғарымы шығарылды, 275 әйел дағдарыс орталығына орналастырылды. Отбасылық жанжалдар бойынша 102 нөміріне түскен қоңырауларды өңдеу тәжірибесі енгізілді. Осылайша, учаскелік инспекторлардың жұмысына бақылау күшейтілді. «Азаматтық бастамаларды қолдау орталығымен бірлесіп, тұрмыстық зорлық-зомбылықтан зардап шеккен және проблемалық отбасыларға құқықтық, психологиялық көмек көрсетіледі. 203 адамның жүріс-тұрысына ерекше талаптар белгіленген, оның ішінде 160-на алкогольдік ішімдіктерді пайдалануға тыйым салынған. Мінез-құлқына байланысты қойылған ерекше талаптарды бұзғаны үшін 203 адам жауапқа тартылды», - деді ведомство басшысы. Сөз соңында Арман Айтмағамбетов әйелдердің құқықтары мен заңды мүдделерін қорғау мәселелері мемлекет басшысының бақылауында екенін айтты.