Астанада «Дина – күй анасы» атты концерт өтеді

31 қаңтар күні елордадағы Е.Рахмадиев атындағы мемлекеттік филармонияның камералық залында «Дина – күй анасы» атты концерт өтеді, деп хабарлады Elordainfo.kz.

Қазақстанның халық әртісі, дәулескер күйші-композитор, «Күй анасы» атанған Дина Нұрпейісованың  қайтыс болғанына 31 қаңтар күні 70 жыл болады. Бұл күні сағат 11.00-де күйшінің ескерткішіне гүл шоқтарын қою рәсімі өтеді.

Сондай-ақ сағат 16.00-де Е.Рахмадиев  атындағы мемлекеттік филармонияның камералық концерттік залында (Абай даңғылы, 29 ғимарат)  елорда тұрғындары мен қонақтары үшін «Дина – күй анасы» атты концерт өтеді. Кіру – тегін.

Аталмыш іс-шараны қалалық Мәдениет басқармасы, Е.Рахмадиев атындағы филармония және республикалық «Күй анасы» қоры ұйымдастырып отыр.

Айта кетейік, Дина Нұрпейісова 1955 жылдың 31 қаңтар күні 94 жасына қараған шақта Алматы қаласында қайтыс болды. Күйші-композитордың туғанына 160 жыл толуы қарсаңында 2021 жылдың 3 шілдесінде, яғни  «Домбыра күні», «Күй анасы» атауымен республикалық қор ашылды. Бұл қоғамдық қор елордамыз Астана қаласының төрінен күй анасына арнап еңселі ескерткіш бой көтеруіне бастамашы болды. Ал ескерткіш жанынан «Қазақ елінің күйшілері мен күйші-композиторлары» атауымен аллея ашылып, қазақ елін өздерінің күйшілік өнерімен танытқан 101 күйшінің есімі мәрмәрға қашалып жазылған естелік тас бой көтерді.

Еліміз бойынша 800-ден астам мәдени-іс шара ұйымдастырылды. Профессор К.Сахабаеваның «Әсемқоңыр», профессор Т.Қуанышевтің «Күй анасы», Қазақстанның еңбек сіңірген әртісі А.Үлкенбаеваның «Дина Нұрпейісова» атты еңбектері жарық көрді. «Дина. Күй құдірет» атты  2 сериялы көркем фильм түсіріліп, көрерменнің жоғары бағасына ие болды. Сценарий авторы  –  С.Қасымбек, продюсері –  Н.Паттеев.

Композитор Әлқуат Қазақбаевтың қобыз аспабына  арналған «Күйші Динаға арнау» атты музыкалық шығармасы жазылды. Биыл үшінші рет Д.Нұрпейісова атындағы «Астана – күй қанатында» атауымен домбырашылардың байқауын өткізу жоспарланып отыр.

Осы күнге дейін қор қаражатына 240 домбыра сатып алынып, аз қамтылған және көп балалы отбасыларына тегін табыс етілді. Дина Нұрпейісованың өмірі, өнері, ортасы мен тегін қамтитын ғылыми-танымдылық негізде жеке энциклопедия жазылуда.