400-ге жуық жас сарбаз әскери ант қабылдады

«Жас бүркіт» тәрбиеленушілері жас сарбаздарының  ант қабылдау рәсіміне қатысты, деп хабарлады Elordainfo.kz Ұлттық ұланның баспасөз қызметіне сілтеме жасап.

Ұлттық ұланның 6655 әскери бөлімінде жаңадан шақырылғандардың әскери ант қабылдауына арналған салтанатты іс-шара өтті. Мұнда 400-ге жуық жас сарбаз Отанға адал қызмет етуге ант беріп, ІІМ Ұлттық ұланының қатарына ресми түрде қабылданды.

Әскери бөлім командирі полковник Еділхан Аймағамбетов бұл күннің маңыздылығын атап өтіп, Ұлттық ұланда қызмет ету – абыройлы міндет пен үлкен жауапкершілік екенін жеткізді.

«Бүгінгі күн мен үшін өмір бойы есте қалады. Ант қабылдау – мемлекетіміздің нағыз қорғаушысы болу жолындағы алғашқы қадам. Мен енді Ұлттық ұланның бір бөлігі екенімді және ел игілігі үшін қызмет етуге әзір екенімді мақтан тұтамын», - деді қатардағы жауынгер Нұрғиса Байлар.

«Жас бүркіт» клубының тәрбиеленушілері Отан қорғаушылар қызметінің маңыздылығын сезіне отырып, рәсімді мақтанышпен тамашалады.