Елордада шетелдік университет филиалдарының көрмесі өтіп жатыр

Әл-Фараби атындағы оқушылар сарайында Ғылым және жоғары білім министрлігі мен Астана қаласы әкімдігінің және Л.Н.Гумилев атындағы ұлттық университетінің ұйымдастыруымен 10 және 11 сынып оқушыларына арналған «Study in Kazakstan» шетелдік 20-дан астам ЖОО филиалдарының көрмесі өтті, деп хабарлады Elordainfo.kz министрліктің баспасөз қызметіне сілтеме жасап.

Шараға Ғылым және жоғары білім министрінің кеңесшісі Руслан Емелбаев, Астана қаласы Білім басқармасының басшысы Қасымхан Сенғазыев, Ұлттық тестілеу орталығы директорының орынбасары Наужан Дидарбекова, ЕҰУ академиялық мәселелер жөніндегі проректоры Ардақ Бейсенбай және шетелдік ЖОО филиалдарының өкілдері қатысты.

«Study in Kazakstan» көрмесінің негізгі мақсаты – Қазақстаннан шықпай-ақ шетелдік ЖОО-да білім алуға мүмкіндік жасау.

Алдағы уақытта шетелдік жоғары оқу орындарының санын арттыру жоспарланып отыр. Бұл туралы Ғылым және жоғары білім министрінің кеңесшісі Руслан Емелбаев өз баяндамасында атап өтті.

«Сіздердің білім алуларыңызға еліміз тарапынан барлық жағдайлар жасалуда. Алдағы уақытта шетелдік ЖОО филиалдарының санын арттырып, қос диплом бағдарламасы бойынша ауқымды жұмыстар атқарылады. Осы өтіп жатқан көрмеден керекті ақпараттарды ала аласыздар деген сенімдемін. Сіздерге алдағы уақытта сәттілік тілеймін!», - деді Руслан Емелбаев.

Айта кетейік, талапкерлер шетелдік жоғары оқу орындарының филиалдарына Ұлттық бірыңғай тестілеудің нәтижесімен түсе алады.

Бүгін басталған көрме ертең яғни 31 қаңтарға дейін жалғасады.