Үржардағы жол апаты: министр зардап шеккен балалардың жағдайы туралы айтты

Денсаулық сақтау министрі Ақмарал Әлназарова әлеуметтік желідегі парақшасында Абай облысындағы жантүршігерлік апаттан зардап шеккен екі баланың сауығып келе жатқанын жазды, деп хабарлады Elordainfo.kz.

«Медицина қызметкерлері командасының жеделдігі мен жоғары біліктілігінің арқасында Абай облысының Үржар ауданындағы жол-көлік оқиғасынан кейін Астана қаласының №2 көпбейінді балалар ауруханасына жатқызылған екі баланың жағдайы жақсарды. Көптеген ауыр жарақаттармен келген қыздың жағдайы тұрақтандырылды, оған сәтті операция жасалды және қазір оның өміріне ешқандай қауіп төнбейді. Екінші пациентке, жеті жасар балаға бүгін сүйектерін бекіту үшін арнайы металл стержендерді пайдаланып, жіліншігіне операция жасалды»,- деп жазды министр.

Ақмарал Әлназарова мұндай заманауи әдіс араласудан болатын жарақаттанушылықты, асқыну қаупін азайтуға және қалпына келтіру процесін жеделдетуге мүмкіндік беретінін айтты.

«Оқиғадан кейінгі алғашқы сағаттардан бастап медициналық бригадалар балаларға шұғыл және жоспарлы көмектің толық көлемін қамтамасыз етті, бұл олардың денсаулығы мен өмірін сақтап қалуға мүмкіндік берді. Балалардың тезірек сауығып кетулерін тілеймін, ал біздің дәрігерлерге олардың қайсарлығы, біліктілігі мен адалдығы үшін шын жүректен алғысымды білдіремін»,- деді ол.