Құрылтайда өткен Үкімет сағатында Мемлекет басшысының тапсырмасына сәйкес қабылданған «Қазақстан балалары» тұжырымдамасын іске асыру барысы талқыланды, деп хабарлайды Elordainfo.kz Құрылтайдың баспасөз қызметіне сілтеме жасап.
Аталған бағдарлама әлеуметтік қамсыздандыру, денсаулық сақтау, білім беру және қауіпсіздік салаларында балалардың құқықтарын қамтамасыз ету мен қорғаудың қолданыстағы тетіктерін біріктіреді.
– Тұжырымдама барлық саланы талдау нәтижесінде анықталған 70-тен астам жүйелі мәселе мен міндетті шешуге бағытталған 158 іс-шарадан тұратын жоспарды қамтиды. Атап айтқанда, тұжырымдама жоспарында баланың бірыңғай цифрлық маршрутын енгізуден, ата-аналарды қолдау және олардың жауапкершілігін арттырудан бастап, балалар ауруханаларын қажетті жабдықтармен қамтамасыз ету, ауылдық жерлерде қосымша білім беру инфрақұрылымын дамыту, қиын өмірлік жағдайға тап болған балаларға, жетім балалар мен ата-анасының қамқорлығынсыз қалған балаларға арналған 111 ұйымның 44-іне күрделі жөндеу жүргізуге дейінгі ауқымды іс-шаралар көзделген. Сондай-ақ Мемлекет басшысының тапсырмасымен жыл басында қабылданған «Қазақстан балалары» тұжырымдамасының міндетін іске асыру аясында Құрылтай депутаттары үш заң жобасын әзірледі, – деді Құрылтай төрағасының орынбасары Динара Зәкиева.
Жалпы, бүгінде Мемлекет басшысының тапсырмасымен балалардың құқықтарын қорғау саласында барлық қажетті заң мен бағдарлама қабылданып, балалардың құқығын қамтамасыз етуге, құқық бұзушылықтың алдын алуға және олардың құқығын қорғауға бағытталған инфрақұрылым мен институционалдық жүйе құрылды. Атап айтқанда, барлық өңірде балалардың құқығын қорғау жөніндегі басқармалар ашылып, балалардың құқығын қорғау органдары қызметкерлерінің мәртебесі заңнамалық тұрғыдан бекітілді.
– Ендігі басты міндет – енгізілген тетіктерді жетілдіру және қабылданған барлық заң мен бағдарламаның сапалы іске асырылуын қамтамасыз ету. Бұл шаралардың барлығы әрбір баланың өмірінде нақты көрініс табуы тиіс, – деп түйіндеді Динара Зәкиева.
Еске сала кетсек, Құрылтай ғылымды қаржыландырудың тиімділігін арттыруға бағытталған ұсынымдар әзірледі.