ТЖМ еліміздің 4 облысында қар көшкіні жүруі мүмкін екенін ескертті

Республика аумағында көшкін қаупі бар 619 учаске бар. Шығыс Қазақстан, Алматы, Түркістан және Жетісу облыстарының аумақтарындағы Қазақстан Алтай, Іле, Жетісу, Талас Алатауы мен Қаратау жоталарының беткейлері аса қауіпті аудандар болып табылады, деп хабарлады Elordainfo.kz ҚР ТЖМ баспасөз қызметіне сілтеме жасап.  

Биік тауларда қар көшкіні қаупі басым, ал оңтүстік және оңтүстік-шығыс өңірлердегі жағдай орташа қауіпті.  

«Мамандардың болжауынша 2025 жылы бұл өңірлерде көшкін белсенділігі ақпан-сәуір айларында артуы мүмкін, бұл кезде қардың өздігінен түсуі жиі кездеседі.  Әсіресе температураның күрт ауытқуы, қалың қар жаууы және қарлы боран болуы мүмкін биік таулы аймақтарға қатысты, бұл көшкін қаупінің артуына себеп болуы ықтимал», - деді Төтенше жағдайлар министрлігі.

Қар көшкіні қаупі бар кезеңнің басынан бастап жабық, жетуі қиын жерлерде өздігінен түскен 24 қар көшкіні тіркелді.

Туристер мен демалушылардың қауіпсіздігін қамтамасыз ету мақсатында қар көшкінінің 58 профилактикалық түсуі жүргізілді, түскен қардың жалпы көлемі шамамен 42 мың текше метрді құрады.