Saryarqa Run: Астанада 5 шақырымдық жүгірістің жеңімпазы анықталды

Фото: автор

Конституция күніне орай Сарыарқа ауданында жүгіруден спорттық шара ұйымдастырылды, деп хабарлады Elordainfo.kz.

31 тамыз күні Астана қаласының әкімдігі маңында 5 шақырымдық ҚР Конституциясы күніне орай Saryarqa Run бұқаралық жүгірісі өтті. Жарыста қатысушыларға шектеу қойылып, тек 500 адам ғана қатысуға мүмкіндік алды.

«Ең бірінші қазақ халқын Конституция күнімен шын жүректен құттықтаймын!

Saryarqa Run марафоны Конституция күнін атап өту қарсаңында ұйымдастырылып, 5 шақырымдық қашықтықты жүгіріп өтуге дайын қатысушыларды жинағанына қуаныштымыз. Бұл марафон тек физикалық төзімділікті ғана емес, сонымен қатар рухтың беріктігін, бірлік пен патриотизмді білдіреді. Жыл сайын мұндай іс-шараларға деген қызығушылықтың артып келе жатқанын көру – бізді спорттық дәстүрлерді одан әрі дамытуға шабыттандырады. Бүгін спорттық марафонға 16 жастан бастап 64 жасқа дейін 500-ден астам әуесқой спортшылар қатысты. Ең бірінші мәреге қатысушы 15 минутта келсе, соңы 40 минутта жетті. Болашақта тағы да ұйымдастыру жоспарда бар. Барша спортсүйер қауымды алда біздің ауданда өтетін дәстүрлі «Koktal run»-да күтеміз», - деді Сарыарқа ауданы әкімі аппараты Әлеуметтік сала бөлімінің басшысы Әділ Қапсалямов.

23 тамыз күні Saryarqa Run жүгірісіне тіркелу ашылып, санаулы сағаттың ішінде 500 адам тіркелді. Жарыстың талабы бойынша тек 16 жастан асқан азаматтар ғана қатысуға мүмкіндік алды. Өзге жүгірістерден ерекшелігі – тіркелген әуесқой спортшылар ешқандай жарна төлемеді.

«Триатлон, Ботаникалық саябақ, EXPO төңірігіндегі жүгірістерден құр қалмаймын. Енді оң жағалауда ұйымдастырылған Saryarka Run бәсекесі де көңілден шықты. Ауа райы да өте қолайлы. Көптеген жандар Астанамыздың тарихи көшелерімен жүріп, сәулетті ғимараттарын көріп, оң бағалауда. Өзім 40 жылдан бері жүгіруді серік етіп келемін. Ұзақ уақыттан бері айналысқандықтан, марафон қашықтықтарына ден қоямын. Бүгінгі шараны тек жаттығу ретінде санаймын. Жастарға берер кеңесім: жастарды салауатты өмір салтын ұстануға кеңес беремін. Бірден 10, 21 шақырымға жүгірмей, аз-аздан бастағандары дұрыс. Әуелі денені қыздырып алған маңызды. Өйткені 5-10 минуттық қарапайым жаттығу болмаса, жарақат алып қалу қаупі жоғары. Өзіме тиген пайдасы – ауруханаға өте сирек барамын. Дәріні сатып алғанша, күнделікті тегін жүгіріп, өзіңмен жұмыс істегенге не жетсін», - дейді 64 жастағы Талапнұр Байзақ атты қатысушы.

Зейнеткер кісі 5 шақырым қашықтықты 27 минутта жүгіріп өтіп, біршама жастарды басып озды.

Жарыстың нәтижесі бойынша, ерлер мен әйелдер 16-49 және 50 жастан жоғары санатта арнайы марапатталды.

16-49 жас. Ерлер.

1-орын. Әкім Еркебай – 15:23 минут

2-орын. Қуаныш Бекенов

3-орын. Архат Қалдыбек