Елордада гүл сататын дүңгіршекке қарақшылық шабуыл жасалды

Астанада полицияның «102» арнасына белгісіз ер адам пышақпен қорқытып, кассадан ақша алып кеткендігі туралы хабарлама келіп түсті, деп хабарлады Elorda.info Polisia.kz-ке сілтеме жасап.

Жәбірленушінің айтуынша, сағат 23.40-та дүңгіршекке ер адам кіріп, ақшаны әкел деп сатушыға пышақ көрсеткен. Сонан соң үстелден кілттерді алып, есікті құлыптап, жарықты сөндірген. Осы уақытта әйел дабыл түймесін басып үлгереді. Ер адам оны иығынан пышақпен жарақаттап, 20 мыңнан астам теңгені алып, «ізін суытқан».

Полиция қызметкерлері қылмыс орнының периметрі бойынша орнатылған бейнекамералар арқылы қылмыскердің ізіне түсті. Жедел уәкілдердің қажырлы жұмысы сәтті аяқталып, күдікті тұрғылықты жері бойынша ұсталды. Ол 25 жастағы қала тұрғыны болып шықты. Ұсталған азамат уақытша ұстау изоляторына қамалды.