Елордада Қонысбай Әбілдің туғанына 70 жыл толуына арналған еске алу кеші өтті

Бүгін Қ.Қуанышбаев атындағы Қазақ ұлттық музыкалық драма театрында Қазақстанның халық ақыны, көрнекті қоғам қайраткері, журналист, сатирик, композитор Қонысбай Әбілдің туғанына 70 жыл толуына арналған «Әй-әй» ақын әлдиі» атты еске алу кеші өтті, деп хабарлады Elordainfo.kz.

Астана қаласы Тілдерді дамыту және архив ісі басқармасы ұйымдастырған іс-шараға Астана қаласы әкімінің орынбасары Есет Байкен, Парламент және қалалық мәслихат депутаттары, Астана қаласы Қоғамдық кеңесінің мүшелері, ақынның отбасы мен достары, зиялы қауым өкілдері, өнерсүйер, өлеңсүйер қауым қатысты.

Ақынның достары, курстастары атынан көрнекті ақын, Мемлекеттік сыйлықтың лауреаты Ұлықбек Есдәулет сөз сөйлеп, естеліктерді жаңғыртты.

Журналист мамандығын алып, еңбек жолын осы саладан бастаған Қонысбай Әбіл Астана елорда болғанда бас қалада мемлекеттік тілді дамыту ісінің негізін қалады. Астана қаласы әкімдігінде Тілдерді дамыту секторы меңгерушісі болып, арада 4-5 ай өткенде, секторды Тіл бөліміне айналдырды. 2002 жылдың басында елордада Тілдерді дамыту басқармасын ашып, ана тілді өркендету бағытында еңбек етті. Сол кездегі Астана қаласы әкімінің орынбасары Төлеген Мұхамеджановтың басшылығымен басқарма жанында қазір де жұмыс істеп жатқан «Руханият» мемлекеттік тілді жеделдетіп оқыту орталығы ашылып, онда өзге ұлт өкілдері де арнайы даярлықтан өтті.

Қонысбай Әбіл қазақтың салт-дәстүрін, мәдениетін, өнерін насихаттау саласында да көптеген жетістіктерге қол жеткізді. Оныңұйымдастыруымен Астана қаласында республикалық деңгейде 10 рет ақындар айтысы өткізілді. Жас ұрпақты халық ертегілері кейіпкерлері рухында тәрбиелеу мақсатында «Тазша бала» конкурсы қолға алынып, ел ішіндегі көптеген таланттардың танылуына жол ашылды. Осы байқаудың жеңімпаздары атанған Данияр Хамзин, Тұрсынбек Қабатов, Ринат Зайытовесімдері бұл күнде республика көлеміне кеңінен танымал. Сол секілді Наурыз мейрамын халықтық мереке ретінде тойлау, Тіл фестивалін қалыптастыру, Абай ескерткіші жанында «Поэзия сағатын» ұйымдастыру, елордада тұратын қаламгерлермен кездесулер өткізу дәстүрге айналды.

Қонысбай Әбіл 2008-2015 жылдар аралығында Қазақстан Республикасы Парламенті Мәжілісінің Редакциялау және аударма бөлімінде сектор меңгерушісі болып еңбек етті. Ұлтымыздың ұмыт бола жаздаған ұлы өнері – ақындар айтысының халқымызға қайта оралуына, оның өркендеп дамуына қомақты үлес қосты. Ол қазақ айтысының ақтангерлері Көкен Шәкеев, Көкбай Омаров, Әселхан Қалыбекова, Әсия Беркенова, Қатимолда Бердіғалиев, Шынболат Ділдебаев, Ерік Асқаров, Монғолиядан келген Тоқтамұрат Жомарт, ресейлік Амангелді Жүсіповтермен сөз сайысына түсті.

Қонысбай Әбілдің  «Бастау» (сықақ өлеңдер), «Көршілер» (повесть пен әңгімелер), «Алаңғасар» (әзіл-сықақ әңгімелер мен скетчтер), «Қонысбайдың қалжыңдары» (әзіл-қалжың, қағытпалар), «Жетпіс жетінің жігіттері» (повестер мен әңгімелер), «Топ жардым туын жықпай туған елдің...» (өлеңдер, толғаулар, айтыстар), «Әй-әй ақын» әлдиі» кітаптары жарық көрген.

Еске алу кешінде Қазақстанның еңбек сіңірген қайраткерлері Нұрлан Өнербаев, Айгүл Қосанова,Айбек Қалиев, Клара Төленбаева, Перизат Тұрарова, Өзгеріс Шерікбай, Шахризат Сейдахмет сегіз қырлы қаламгердің әндерін шырқаса,«Жастар» театры мен Ә. Мәмбетов атындағы мемлекеттік драма және комедия театры актерлері шығармаларын көрермен назарына ұсынды.

                                                                      Аманғали ҚАЛЖАНОВ