Біз үшін Конституция тек заңды құжат қана емес, ол білім беру ісінің негізгі қағидаты – елордалық мектеп директоры

Биыл Ата заңымыздың қабылданғанына 30 жыл толып отыр. Осы кезеңде білім беру жүйесі мен бала құқықтары саласында көптеген маңызды реформалар жүзеге асырылды. Астанадағы Фариза Оңғарсынова атындағы №77 мектеп-гимназияның директоры Нұрлан Ысқақовтың айтуынша, елімізде білім беру жүйесі тең және қолжетімді болуы үшін барлық қажетті жағдайлар жасалып жатыр, деп хабарлады Elordainfo.kz.

Кеше Мемлекет басшысы Конституцияның 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда сөз сөйлеп, Конституциямыз өркениетті болашаққа жол ашатын, халқымыздың игілігіне қызмет ететін Ата Заң екенін атап өткен болатын.

«Конституция әрбір азаматтың сапалы білім алуына толық кепілдік береді. Осы негізде елімізде барлық мектептерде тегін білім беру жүйесі жолға қойылған. Біздің мектебімізде бүгінде 1700-ден астам оқушы білім алып жатыр. Олардың ішінде ерекше білім беру қажеттіліктері бар балаларға да тең қолжетімділік қамтамасыз етілген. Мектеп ғимаратына кедергісіз кіріп-шығуға арналған арнайы инфрақұрылымдар мен жағдайлар қарастырылған. Бұл балалардың толыққанды білім алуына және әлеуметтік ортаға белсенді араласуына мүмкіндік береді. Әрбір шәкірттің құқығы мен қауіпсіздігі мектеп әкімшілігінің басты назарында», - дейді мектеп директоры.  

Нұрлан Меңдібайұлы әрбір баланың сапалы білім алу құқығы, еркін дамуы және қорғалуы білім беру қызметінің басты қағидаты деп есептейді.

«Бұл қағидаларға сүйене отырып, мектеп ұжымы оқушылардың жан-жақты дамуы үшін тең мүмкіндіктер жасап, олардың қауіпсіздігі мен әл-ауқатын қамтамасыз етуге барынша күш салуда. Біздің мектепте арнайы педагогтер, әлеуметтік педагогтаер және психологтар жұмыс істейді. Олар оқушылардың психологиялық жайлылығы мен қауіпсіздігін тұрақты түрде бақылап, жан-жақты қолдау көрсетеді. Біз үшін Конституция тек заңды құжат қана емес, ол білім беру ісінің негізгі қағидаты болып табылады. Осыған орай, біз өз жұмысымызда білім берудің сапасы мен қолжетімділігін арттыруға, оқушылардың құқықтары мен қауіпсіздігін нығайтуға ерекше мән береміз. Себебі әр баланың білім алуы мен қауіпсіз ортада өсуі елдің дамуының негізі әрі жарқын болашағының кепілі деп есептеймін», - деді Нұрлан Ысқақов.