Отандық ғалымдар сары май мен өсімдік майы негізінде жаңа спред жасап шығарды

Фото: АШМ

Қазақстандық ғалымдар сары май - өсімдік майы негізіндегі спред рецептурасын әзірледі. Оның ерекшелігі – Омега-3 пен Омега-6 полиқанықпаған май қышқылдарының арақатынасын 1:5 деңгейінде қамтамасыз ететін сүт майы, рапс және зығыр майының үйлесімінде болып отыр, деп хабарлайды Elordainfo.kz АШМ баспасөз қызметіне сілтеме жасап.

Өнімдегі майдың массалық үлесі 72,5%-ды құрайды. Зерттеу нәтижелеріне сәйкес, өнімнің сіңімділігі 97–98%. Спредте қаныққан майлар мен холестерин мөлшері төмен. Өнім 10-нан 30 °С-қа дейінгі температурада өзінің жұмсақ әрі жағылу қасиетін сақтайды.

Рецептурада отандық шикізатты — сүт майын, рапс және зығыр майларын пайдалану көзделген. Технологияны май-тоңмай өнеркәсібі кәсіпорындарының қолданыстағы өндірістік желілеріне интеграциялауға болады.

Әзірленген рецептура мен технологиялық режимдер негізінде технологиялық құжаттама әзірленді.

«W-баланс» спреді функционалдық және диеталық тағам өнімдерін өндіруге арналған. Сонымен қатар оны санаторийлік-курорттық және емдік-профилактикалық тамақтануға арналған өнімдерде, сондай-ақ Healthy Food сегментінде пайдалануға болады», - делінген хабарламада.

Еске салайық, бұған дейін елімізде сары май өндірісі шамамен 50% артқаны туралы жаздық.