Мұрат Әбенов: Абай күні - рухани мұра күні

Фото: Мұрат Әбеновтің жеке парақшасынан

Абай күні – ұлттың рухани мұрасына қайта үңіліп, ұлы ойшылдың тағылымын бүгінгі қоғаммен сабақтастыратын маңызды күн. Биыл қазақтың ұлы ақыны, ағартушысы әрі композиторы Абай Құнанбайұлының туғанына 181 жыл толып отыр. Осыған орай қоғам қайраткері, Парламент Мәжілісінің депутаты Мұрат Әбенов Абай мұрасының білім, еңбек, адамгершілік пен ұлттық сана қалыптастырудағы маңызына тоқталды, деп хабарлайды Elordainfo.kz.

«Бүгін Қазақстанда ұлы қазақ ақыны, ағартушы әрі композитор Абай Құнанбайұлының туғанына 181 жыл толуына орай Абай күні аталып өтуде.

Абай Құнанбайұлы қазақ әдебиеті мен мәдениетінің тарихында өшпес із қалдырды. Оның шығармашылығы ұлттық сананың маңызды бөлігіне айналды. Білімге ұмтылу, еңбек, адамгершілік пен ізденіс туралы ойлары бүгінгі күні де өзектілігін жоғалтқан жоқ.

Абай мұрасында қазақ оқырманын әлем әдебиетімен таныстыруға деген ұмтылысы ерекше орын алады. Ол Пушкин, Лермонтов, Байрон және Гётенің шығармаларын қазақ тіліне аударып, халқымыздың мәдени және рухани көкжиегін кеңейтуге үлкен үлес қосты.

Абай күні Қазақстанда 2020 жылдан бастап жыл сайын 10 тамызда ресми түрде атап өтіледі. Мен үшін бұл күн - Абай шығармаларына қайта үңіліп, оның көптеген ой-тұжырымдарының бүгінгі қоғам үшін де қаншалықты маңызды екенін ой елегінен өткізетін жақсы мүмкіндік», - деді Мұрат Әбенов.