Конституция күні: Астанада салауатты тағам мен спорт фестивалі өтеді

Фото: Оңалхан Өнерхан

Астанада 30 тамыз күні Конституция күні мерекесіне орай салауатты тағам мен спорт фестивалі өтеді, деп хабарлады Elordainfo.kz.

Dämden деп аталатын іс-шара Орталық саябақтың аллеясында – «Қазақстанның Күні» монументінен субұрқаққа дейінгі аралықта өтеді. Іс-шараның ұйымдастырушысы – Visit Astana.

Dämden пайдалы тағам мерекесі мәдени, оқиғалық және гастрономиялық туризмді дамытуға, сондай-ақ Астананың заманауи әрі бірегей мегаполис ретіндегі имиджін қалыптастыруға бағытталған жоба. Ол гастрономияны, спортты және саналы өмір салтын біріктіреді.

Фестиваль аясында мынандай ерекшеліктер бар:

• Фуд-маркет – Астана мен Қазақстан өңірлерінен әкелінген пайдалы өнімдер: жаңа піскен көкөністер мен жемістер, қолөнер бұйымдары, пайдалы десерттер, шайлар, суперфудтар;

• Салауатты тамақтану мейрамханалары аймағы – авторлық тағамдар мен дұрыс тамақтануға арналған мәзір;

• Шеберлік сыныптары;

• Диалог алаңы – денсаулық, тамақтану, спорт пен саналы өмір салтына қатысты мамандардың дәрістері;

• Белсенділік аймақтары – йога, фитнес және басқа да спорттық тәжірибелер;

• Музыкалық бағдарлама – әртістер өнер көрсетеді.

Dämden бүкіл отбасы үшін пайдалы әрі жарқын демалыс атмосферасын қалыптастырады. Қонақтар үшін денсаулық пен өзін күтуге қатысты түрлі шеберлік сабақтары, ересектер мен балаларға арналған белсенділіктер ұсынылады.

Фестивальдің мақсаты – салауатты әрі саналы өмір салтын қалыптастыру, жергілікті өндірушілерді қолдау және қалалық мәдениетті дамыту.