«Халық қатысатын бюджет-2025»: «Байқоңыр» ауданында өтінім қабылдау жалғасып жатыр

Астана қаласы «Байқоңыр» ауданында «Халық қатысатын бюджет-2025» жобасы аясында абаттандыру үшін өтінімдер қабылдау жалғасып жатыр, деп хабарлады Elordainfo.kz.

Жобаның мақсаты – тұрғындардың бастамасы мен ұсыныстары бойынша ауданды абаттандыру.

Өз ұсыныстарын «Байқоңыр» ауданының кәмелетке толған барлық тұрғындары жібере алады.

«Егер Сіздің жобалық ұсынысыңызды дауыс беру процесінде басқа тұрғындар қолдаса, ол осы жылы қалалық бюджет қаражаты есебінен іске асыруға ұсынылатын болады.

Ұсыныстарды «Байқоңыр» ауданы әкімдігінің ресми интернет-ресурсына baikonyr-astana.kz жіберуге болады («Халыққа қатысатын бюджет-2025» бөлімінде)», - делінген хабарламада.

Ұсынысты жіберу үшін өтінімді толтыру қажет (жобаның атауын, оның сипаттамасын көрсету), сұлбасы мен сметаны (индикативті болуы мүмкін), ағымдағы күйдің фотосуреттерін, қалауыңыз бойынша презентацияны тіркеу қажет. Осы бөлімде жобаның ережелері, типтік жобалық ұсыныс, жоба бойынша іс-шаралар мерзімі, сараптамалық кеңестің құрамы көрсетілген.

Сараптамалық кеңес шешімінің нәтижелері әкімдіктің интернет-ресурсында жарияланатын болады. «Астана қаласы «Байқоңыр ауданы әкімінің аппараты» ММ сараптамалық кеңесінің шешімі негізінде жобалық ұсыныстарды іске асыруға кіріседі.

Жобалық ұсыныстарды іске асыру барысы, сондай-ақ оларды іске асыру қорытындылары туралы ақпарат әкімдіктің интернет-ресурсында жарияланатын болады.

Ұсыныстар 2025 жылдың 1 наурызына дейін қабылданады.

«Халық қатысатын бюджет» жобасы аясында қосымша сұрақтар бойынша +7 708 205 0556 байланыс нөміріне хабарласуға болады.