Елордада этноауылдардың жұмысы қашан аяқталады

5-ші Дүниежүзілік көшпенділер ойындары аясында Астанада 5 этноауыл жұмыс істейді, деп хабарлады Elordainfo.kz.

Олар «Қазанат» ипподромы, «Қазақ елі» монументі, «Ататүрік» саябағы, «Бәйтерек» монументі және Орталық саябақ аумақтарында орналасқан.

«Көшпенділер Әлемі» этноауылы жұмысты 13 қыркүйек күні сағат 19.00-де аяқтайды. Бұл туралы Астана қаласы әкімдігі мәлімдеді.

«Көшпенділер Әлемі» этноауылы «Қазанат» ипподромының жанында 10 гектар аумақта орналасқан. Этноауыл бірнеше орынға бөлінген: орталық алаң, ұлттық ойындарға арналған балалар ойын алаңы, халық музыкасына арналған шатыр, ашық аспан астындағы көшпелі Өркениеттер мұражайы, спорттық іс-шаралар, ұлттық тағамдар, басты сахна, аймақтардың этникалық қоныстары, қолөнершілері және Шығыс базары бар арнайы қала.

Этноауыл аумағында көптеген кәдесый табуға болатын Шығыс базары ұйымдастырылған. Еліміздің екі жүзден астам қолөнершілері өз өнімдерін ұсынып отыр.

«Қазақ елі» монументінің, «Ататүрік» саябағының, «Бәйтерек» монументінің және Орталық саябақтың жанында орналасқан этноауылдар аумағында киіз үйлер орнатылып, қолөнершілер жасаған ұлттық кәдесыйлар сатылады. Шатырларда ұлттық тағамдар (ірімшік, жент, тары,талқан, құрт және т.б.) және сусындар (қымыз, шұбат) бар. Сонымен қатар этноауылдар аумағында концерттік бағдарламалар мен спорттық іс-шаралар өтуде.

Сондай-ақ фотоаймақтар жұмыс істейді, Қазақстанның көшпелі мұрасына арналған картиналар сатылымы ұйымдастырылды.

Этноауылдар келесі орындарда орналасқан және келесі кесте бойынша жұмыс істейтін болады:

Есіл ауданының аумағында орналасқан «Бәйтерек» монументінің алаңындағы этноауыл сағат 11.00-ден 23.00-ге дейін жұмыс істейді. Өз жұмысын 15 қыркүйекте аяқтайды (сағат 11.00-13.00).

Алматы ауданында орналасқан «Қазақ елі» монументінің жанындағы этноауыл сағат 10.00-ден бастап ашылып, сағат 23.00-ге дейін жұмыс істейді. Жұмысты 14 қыркүйекте аяқтайды (сағат 10.00-ден 20.00-ге дейін).

Байқоңыр ауданының аумағындағы этноауыл «Ататүрік» саябағында ұйымдастырылған. Этноауыл сағат 15.00-ден 20.00-ге дейін ашық. Ол жұмысты 14 қыркүйекте аяқтайды (сағат 15.00-ден 20.00-ге дейін).

Нұра ауданының аумағындағы этноауыл орталық саябақта орналасқан. Сағат 12.00-ден 20.00-ге дейін жұмыс істейді. Этноауыл «Қазақстандық күн» монументінен (сағаты бар монумент) субұрқақ тостағанға дейін ұласып жатыр. Аллея бойымен өтіп бара жатып, тұрғындар мен қонақтар әртүрлі ұлттық ойындарға қатысу арқылы өздерінің күші мен ептілігін тексере алады. Өз жұмысын 13 қыркүйекте аяқтайды (сағат 12.00-ден 20.00-ге дейін).

14 қыркүйекте «Қазақ елі» монументінің аумағы, «Ататүрік» саябағы, «Бәйтерек» монументі және Орталық саябақта концерттік бағдарламалар ұйымдастырылады. Концерттік бағдарламалар сағат 18:00-ден 20:00-ге дейін өтеді.Мұнда  Мәдениет басқармасының ведомстволық бағынысты мекемелерінің шығармашылық ұжымдары мен солистері, сондай-ақ белгілі өнер қайраткерлері мен отандық эстрада жұлдыздары қатысады.