Іздеу 
Думан Аманжол
Бүгін еліміз бойынша Маңғыстау облысында әскери қызметшілердің қызметтік міндеттерін атқару кезінде қайтыс болуына байланысты жалпыұлттық аза тұту күні өтіп жатыр, деп хабарлайды Elordainfo.kz.
Бұл туралы Мемлекет басшысы Қасым-Жомарт Тоқаев тиісті өкімге қол қойды.
«Мемлекет басшысының өкімімен Маңғыстау облысында қызметтік міндеттерін атқару кезінде әскери қызметшілердің қазаға ұшырауына байланысты Қазақстан Республикасында 2026 жылғы 25 қыркүйекте жалпыұлттық аза тұту жарияланды», – делінген өкім мәтінінде.
Еске салсақ, кеше Маңғыстау облысында оқу-жаттығу-жауынгерлік тапсырманы орындау кезінде ауа райының күрт нашарлап, желдің күшеюіне байланысты 17 адам суға кеткен. Оның 12-сі қаза тауып, үш әскери қызметші құтқарылды. Қалған екі әскери қызметшіні іздестіру жұмыстары жалғасуда.
Қайғылы оқиғаның себептерін анықтау үшін Премьер-министрдің өкімімен үкіметтік комиссия құрылды. Сондай-ақ Мемлекет басшысы қаза тапқан әскери қызметшілердің отбасы мен жақындарына көңіл айтты.
Бүгін жалпыұлттық аза тұту күніне байланысты елімізде мемлекеттік органдар мен жергілікті өзін-өзі басқару органдарының, сондай-ақ шетелдегі Қазақстанның дипломатиялық өкілдіктерінің ғимараттарындағы Мемлекеттік Ту төмен түсіріледі.
