«Астана Опера» театры экскурсия мен шеберлік сыныптарына шақырады

Орталық Азиядағы ірі театр атанған «Астана Операға» әлемнің түкпір-түкпірінен көптеген саяхатшы келеді. Өйткені, ол тек өнер ордасы ғана емес, шаһардағы тұрғындар мен қонақтар қызықтайтын сәулетті ғимараттардың бірі саналады, деп хабарлады Elorda.info.

Былтырдан бері театр жазғы демалыс кезінде оқушыларға танымдық экскурсиялар өткізеді. Аталмыш экскурсия аясында театр қызметкерлері балаларды ноталық кітапхана, декорация және киім ауыстыратын бөлмелермен таныстырады.

Экскурсия қатысушыларына көбіне бутофор және тігін цехтары ерекше қызық. Себебі балалар спектакльдер үшін арнайы тігілген костюмдер мен реквизиттерді дайындау процесін көре алады. Іс-шара барысында тігін, сурет салу бойынша шеберлік сабақтары өтеді. Бұл балаларға өздерін өнер әлемінің бір бөлшегі ретінде сезінуіне және өздерін сынап көруге мүмкіндік береді.

Айта кету керек, театрдың іс-шараларына көбіне көрші елдерден Ресей, Өзбекстан, Қырғызстаннан келген меймандар билеттер сатып алады, сондай-ақ Қытай, Түркия, Германия және АҚШ-тан да келушілер бар.