Республикалық физика-математика мектебі қабылдау емтиханының форматын өзгертті

Республикалық физика-математика мектебі 2025-2026 оқу жылында қабылдау емтиханын жаңа форматта өткізеді. Ол туралы бүгін Республикалық физика-математика мектебінің Астана және Алматы қалаларындағы филиалдарында өткен ашық есік күнінде белгілі болды, деп хабарлады Elordainfo.kz.  

Екі қала бойынша мыңға жуық оқушы мен ата-ананың басын қосқан ауқымды іс-шара барысында Астана қаласындағы филиалдың директоры Думан Кенжалин және Алматы қаласындағы филиалдың директоры Мейірлан Едігерұлы мектептің  өткені мен бүгініне тоқталып өтті.

Кейін халықаралық, республикалық олимпиадалардың жеңімпаздары өз жеңістері жайлы ерекше ықыласпен баяндады. Сонымен қатар, 5-6 сыныптың оқушылары мен ата-аналары мектеп өмірімен жақынырақ танысуға мүмкіндік алды. Оқушылар өз қолымен құрастырған роботтарымен таныстырды. Сонымен қатар, қатысушылар химия, математика және физика пәндері бойынша қызықты тәжірибелердің куәгері болды.  Бұл күні оқушылар өздерін бір күн «Физмат» мектебінің оқушысы ретінде сезініп көрді. Оқушылар үшін арнайы шеберлік сағаттары да ұйымдастырылды. Оның барысында олар 7-сыныпқа түсуге арналған қабылдау емтиханының жаңа форматы бойынша тапсырмаларды қалай орындау керектігін РФММ мұғалімдерінің өздерінен  сұрап-білді.

 Айта кету керек, ашық есік күнін өткізудегі ең басты мақсат та сол, 2025-2026 оқу жылына іріктеу емтиханның жаңа форматымен таныстыру еді. 

«Жауап нұсқалары жоқ ашық тест болады, оқушы бүтін сан болып табылатын жауапты енгізуі керек. Әр түрлі күрделіліктегі тапсырмалар арнайы белгіленген ұпайлар бойынша бағаланады. Математика және логика бойынша ғана тапсырмалардан тұратын 30 тест сұрағын орындау үшін оқушыға 120 минут беріледі», - деді «РФММ» КеАҚ Басқарма төрағасының орынбасары Светлана Меңдіғалиева.

2024 жылдың желтоқсан айында сынақ тестіне тіркелу басталады. Ол жерде оқушылар жаңа форматқа негізделген тест сұрақтарына жауап беріп дайындала алады. Сұрақтар 2 апта сайын жаңартылып отырады.

Ал, 2025 жылғы 15 қаңтарда Астана уақыты бойынша сағат 10:00-де мектептің ресми сайтында емтиханға онлайн тіркелу ашылады және ол 2025 жылғы 3 сәуір сағат 18:00–дейін жалғасады. РФММ емтихандары Астана, Алматы, Шымкент, Түркістан, Орал және тағы бірнеше қалада ұйымдастырылады. 2025-2026 оқу жылына арналған мемлекеттік білім беру гранты бойынша 7-сыныпқа оқуға түсу емтиханы 2025 жылғы 26 сәуірде өтеді.

«Менің қызым осы РФММ-ге түсуді армандайды. Бүгінгі ашық есік күнінің ұйымдастырылуы өте жақсы, көңілімізден шықты. Көп сұраққа жауап алдық. Мен тест сұрақтарының жауаптарды ашық форматта және бүтін натурал сандармен белгілеуге ауыстыру өте орынды деп ойлаймын. Өйткені, оқушы бұл жерде ойланып, есептің шешімін тауып қана жауап бере алады. Ал, бұрынғы жүйе бойынша ол білмесе де бір жауапты белгілер еді», - деді ата-аналардың бірі.

Ата-аналармен қатар ұстаздар да жаңа форматты қолдап отыр. Бұл отандық білім беру сапасын дамытуға үлес қосады. Мықты математиктер  мен физика, химия, информатика салаларындағы ғалымдарды дайындауда аталған жаңалық өз нәтижесін береріне сенім мол.