Header Banner

Астанада ауыл мектептерінің дарынды оқушылары республикалық олимпиадада бақ сынап жатыр

Астанада ауыл мектептерінің дарынды оқушылары республикалық олимпиадада бақ сынап жатыр
Фото: Оқу-ағарту министрлігі

16–20 қараша аралығында Астанада ауыл мектептерінің оқушыларына арналған республикалық олимпиаданың қоғамдық-гуманитарлық бағыттағы қорытынды кезеңі өтіп жатыр. Еліміздің барлық өңірінен келген 10–11-сынып оқушылары екі турда жеті пән бойынша білімін сынайды, деп хабарлайды Elordainfo.kz Оқу-ағарту министрлігінің баспасөз қызметіне сілтеме жасап.

Олимпиада ауыл мектептеріндегі дарынды оқушыларды қолдауға бағытталған. Республикалық дода оқушыларға өз қабілетін танытуға, қатарластарымен тәжірибе алмасуға және қызығушылық танытқан пәндерін тереңірек меңгеруге жол ашады.

Биыл олимпиаданың екі бағыты бойынша ауыл мектептерінен 135 мың оқушы тіркелді. Мектеп кезеңіне 90 мыңнан астам, аудандық кезеңге 70 мыңға жуық, облыстық кезеңге 16 мыңнан астам оқушы қатысты.

Жеңімпаздар мен жүлдегерлер Оқу-ағарту министрлігінің I, II және III дәрежелі дипломдарымен, сондай-ақ алтын, күміс және қола медальдармен марапатталады. I дәрежелі диплом иегерлері 2026–2027 оқу жылындағы жалпы білім беретін пәндер бойынша республикалық олимпиаданың қорытынды кезеңіне қатысу құқығына ие болады.

Финалға қатысқан барлық оқушы «Дарын» республикалық сырттай мектебінде білім алып, алдағы зияткерлік сайыстарға дайындалу мүмкіндігіне ие болады.

Еске салсақ, таяуда Астанада жаратылыстану-математикалық бағыттағы пәндер бойынша XIX Президенттік олимпиада өтті.